【食譜】黑雨的菜單：照燒雞

原本包包今日要上學習班，但因為紅雨，紅雨我都已經決定唔帶佢出去，後來仲黑雨添。

每個星期三包包上完英文班後，我就會帶佢去食午餐，通常佢乖我都准佢自己決定食乜。

佢通常都會話：廚師雞肉飯，但實情我都唔知係乜，有時佢話要食壽司，試過一次拉我入麥當奴，久唔久我都會比佢食一次。

而我呢？每次佢上課時我都會到附近茶餐廳飲凍檸茶。

今日一場雨我同佢都留晌家，不過我家總會有食材。

晌床下底個餅罐有半隻鮮雞……哈哈。

成日蒸雞好悶，但時間緊逼又唔想炆，於是整照燒。

由於今日本身無打算寫食譜所以無影step，見諒。

材料：

雞半隻(或1隻)

醬汁：

老抽    1茶匙

生抽    半湯匙

味醂   2茶匙

糖   1茶匙

水    1湯匙

洋蔥    1個

蒜頭   2粒

做法：

1. 雞用少許鹽撈勻，加少許生粉再撈勻醃15分鐘

2. 將雞煎至金黃色，加入蒜頭兜勻，再加入洋蔥兜勻

3. 將醬汁所有材料攪勻後倒入鑊兜至收汁便完成

4. 可以灑啲炒過芝麻增加香味