【食譜】童年回憶：梅子蒸蟹

今個假期仍然多姿多采，我同朋友3個女人一個墟咁晌JW食 Tea buffet，又去了 Bella小朋友個生日會，再有時間修下啲頭髮。

跟住昨日先同大少爺一齊行街再帶包包去公園玩，夜晚重回我個廚房。

一直念念不忘梅子蒸蟹，並不是我曾經食過，甚至乎我跟本未食過，但一直記得大家姐話過最後一次同爸爸出街係去尖沙咀一間上海菜館食飯，爸爸好好胃口食好大碟梅子蒸蟹，過幾日就入了醫院然後無耐就化作天上一粒星星。

其實到依家我都唔知佢晌邊間食同埋個味道係點，只記得梅子蒸蟹。

今日去完街的起心肝試整，我整嘅版本唔知係咪當年嘅味道，但至少我覺得好好味，只適合喜歡惹味嘅人去食。

我今晚就帶著爸爸DNA去食呢個梅子蒸蟹，時間會醫治傷心。

抬起頭向前望有美好風景，堅持帶著佢嘅 DNA好好過生活。

做法：

我好叻整蟹，因為食大閘蟹所以識去宰割佢。

買新鮮蟹回家後，如果唔係即食就放入冰格一小時

雪到隻蟹暈甚至瓜老襯先整， 咁隻蟹肉質會保持彈性同鮮甜，否則隻蟹太早處決肉會霉的。

梅子，係雜貨店鹹梅子。

用4-5粒樁爛佢，啲醃梅子水唔好要太鹹。

將梅子樁爛加入蒜粒(我用了3粒)、辣椒及2茶匙糖撈勻。

搽上蟹面後蒸10至15分鐘。