前幾日，參加了由一間大學社會科學系所舉辦的focus group，討論了好幾個大是大非的問題，包括房屋政策、青少年發展機會、中港關係、上流力等等問題，共有九個人，有男有女，年齡為中年人士以下，當中來自五湖四海，有social media specialist、IT startups、marketing人、HR consultant headhunter、personal trainer、年青朋友等等…
當中，有一些議題，比較controversial的，都引來一些少爭辯，例如，香港年輕人的社會上流力局限性、中港融合會帶來更多機會定競爭、香港社會撕裂究竟為何？
其實，討論這些問題，很多時是關於價值觀和理念上的分歧，而非關於「概念」或「事實」上的客觀驗證。價值觀和理念，是喜惡，憑個人經驗和觀感為依歸。概念和事實，可以用方法來清楚辨證，比較少用主觀判斷。
例如，講到中港融合會帶來更多機會定競爭時，有朋友說我們（香港）不應只重視大陸市場，為大陸人傾斜政策，導致大陸同胞上、中、下三路（企業層面收購合併、移民與走資、單程證與綜援）令到香港吃不消，香港的人才亦無工可做。另有一些朋友就說，中國是全球最大市場，香港點解唔把握機會，多跟中國公司做生意，反正西方國家經濟唔夠好，出唔到/足budget，同佢地做生意無錢賺。連美國總統都叫外孫女，唱歌討好國家主席，其他國家都進取，點解香港會落後？
我第一次參加這種focus group，覺得好新奇，仲講左一些睇法，沒有對錯與批判，只是一些感悟與分享。
多年前，有朋友做big4，後來去了上海附近一間廠做駐場的FC，負責管數。愈做愈覺得不受尊重，管理失控，於是返香港算。例如，成日面對工人唔聽話、廠長同工人同鄉同聲同氣連成一起、無跟足節流及監控措施、紀律差等等，無癮，於是走，搞唔掂企管。
有朋友在深圳設立IT部，以為成本輕D，請3個先等於香港1個。點知，原來high野，員工流失率超級快，加上重新招人的行政成本、staff training cost、交通來往的成本與time cost，計唔到數，最後都要搬返香港，都係香港比較穩紮穩打。
仲有，我喜歡睇繁體多過簡體，喜歡寫簡體多過繁體，不過用字方面，點都喜歡香港同台灣的字眼。討好就討好、友善就友善，咩叫「釋出善意」？增長就增長，退步就退步，咩叫「負增長」？太多虛字用語，唔實在，唔夠「到位」……咪住，以前叫「唔中point」，幾時不知不覺間，變左做唔夠「到位」呀？
好多野，已經慢慢在變。由自己做莊，到慢慢做閒。由參與，到慢慢旁觀。以前，少D人會討論中港融合會帶來更多機會定競爭，因為一融合，代表你有機會食人。宜家，講融合，係你有機會被人食左。以前，有東方、南華同精工；宜家，有恆大淘寶隊。以前，用自身力量去影響別人；宜家，要花費力量去減慢別人影響自己。
有首歌叫「時代巨輪」，好應景。
「無能力修正，無能力嗌嗌嗌嗌嗌停
一開始誕下已經蒼老
一開始拍翼已追不到
當骨牌瀉下已知道
天天迫我上路 天天迫我進步
難避免捲入時代太恐怖」
