【食譜】日式豆腐

一直好想整日式豆腐，有一個外皮做出來靚靚地，但我一直都炸唔出美好嘅豆腐。

又唔識做個外皮直到上星期睇到個煮食節目，就知道點做。

本身想昨晚就煮，但昨晚太累只能做個牛肉飯，今晚就試整。

老老實實我今個月接了好多廣告，係時候要陸續放送，所以趁可以post自己食譜時就快快做。

個豆腐做得好，個肉碎又係咩？

用大量洋蔥、豬肉碎同枝豆炒，醬汁係日式醬汁，因為我唔想落蠔油。

如果大家做都可以用蠔油代替，但大少爺同包包都鍾意日式味道，於是我就投其所好呢，呢個好味！

食譜：

硬豆腐    2-3件  

雞蛋    1隻

生粉   大量

肉碎   $20

枝豆  半碗

(枝豆日式超市有售，去皮後半小碗便可以)

洋蔥    半個

汁料：

醬油或生抽    2湯匙

味醂   1湯匙

糖  1茶匙

水   50ml

做法：

1. 豆腐煮之前一小時拎出來，用隻重身碟壓上豆腐上，水份就會逼出

(唔使怕會難，硬豆腐比較堅強頂得住)

2. 將豆腐切件，先沾一層生粉、再沾上蛋液、再沾上一層生粉

3. 可以半煎炸或炸至實身，如果可以再翻炸一油效果更好

4. 用大火炸，咁就唔會吸油

5. 炸好備用

6. 最好先炸一次然後放晌度，去炒完個肉鬆後再翻炸就剛剛好

7. 炒肉碎，洋菜同肉碎炒香，放入枝豆兜兜兜

8. 然後將醬汁材料全部攪勻後就倒入鑊炒炒炒，淋上豆腐面便完成。