（網上圖片）
朋友說，寫香港教育的題材，多都沒完沒了。
你有無發現，無論中小學幼稚園，學校愈是肯操練學生，愈沒有收生壓力？如果學校唔比功課學生做，學生會點諗？家長會有甚麼感受？家教會又會點諗？邊種家長最喜歡自己仔女，係無功課壓力下成長、同呢種環境氣氛下學習呢？中產、有錢人、定基層朋友？你想注重運動、創新定學術發展呢？重視創意、自由、定規矩呢？
我在石硤尾長大，幼、中、小、大學，都在南山村/白田/大坑東/石硤尾/九龍塘一帶讀書渡過，就算讀城大，它都在南山村旁，經常行過去食lunch食tea，由南山酒家變成了品香樓，一路照食。南山村的彩虹橋2樓平台花園，由比小朋友玩變成了比龍友影相，一路照拍。而讀書風氣，亦變了不少。細個讀書，為讀書本身。宜家讀書，是為了讀書所衍生出來的價值。例如：
讀書，最重要係學習知識。不過，宜家有internet、google、Facebook，連Y Incubator都有書讀，仲點可以話上課一定要在課室？
讀書，最重要係得到學歷證書和資格。幾時都係。做保險要上code，小學畢業總不能成為COT、TOT吧？而做management，無一、兩個EMBA旁身，總不夠型吧？賓大？無倫是菲律賓定美國賓州都一樣夠照，更可況，oxford同oxford brookes的分別，一般人都唔會有心機考究。有證書，夠照、夠用就好了。
讀書，最重要係識人。細個所認識、培養的圈子，比大個時所認識、以利益化、有生意往來為主導的關係，比較有基礎，有empathy，有了解，有共鳴。除非你是擅長遊走於不同商會、有一官半職在公共機構、或每日去LKF同大陸勁喝豪飲出賣liver等的networking達人；否則，讀書時的伙伴，會是你第一批或最重要的合作單位或客戶。有朋友話，一個月5萬蚊出糧，可惜連酒水都唔夠比呢！用成球野讀EMBA，不如join觀瀾湖個golf membership？
讀書，最重要係學習做人，學態度。要積極、自律，self-motivated，鬼唔知咩。通常學到grey area play safe，已經唔錯。學自立自理能力、學社會運作、學營運、學manipulation同被bullying的分別、學習及發掘主流的社會價值觀同個人的差別……嘩嘩，學懂掌握到以上一D已經唔得掂！
讀書，最重要係讀得快樂。得，除非你超級有錢；或者你的父母對成績don’t give a damn，這個可能不大。
讀書，最重要係培養思考和判斷能力。OK，bullshit，咁係屋企自己睇Bertrand Russell或者李天命啦，不過，你估下宜家啲人去圖書館多定用google搵野多？唔好講思考和判斷能力，連「求真」的動力都不大呀，做大行做啲啲都出事呀，更可況對待一個在social media上無關痛癢的轉發post？係咪content farm都唔知啦！
香港其實係咪重視公共教育的地方，我真係唔清楚。不過，以教學方法、商業及市場推廣觸角來說，香港的商業教育水平肯定唔差。又NLP、DISC、MBTI、IN、AP、Meta-coaching、MBA、DBA、post-graduate等等……一大堆野，只要你有錢，咩都可以讀到。
個問題係，讀書，原意係為錢架咩？讀書幾時變左做social control手段之一呀？
