【食譜】自己腸仔自己整！吃得健康～蒜香芝士牛肉香腸

我由細到大都好鍾意食香腸，呢樣係咁多年都鍾意食，但人越大當然知跟本唔可以食得多。

所以我鍾意唔代表我擁有。

對呀包飲食都睇得幾緊，佢無得食朱古力、零食外，加工食物都唔比佢食。

但有一次開party佢試食過菠蘿腸仔，當然令佢有如同「世間竟有如此美男」一樣既開心大發現。

就係咁佢認識到香腸呢樣越美麗越不可碰既食物。

不過……佢呀媽即係我並非浪得虛名，既然瞞得一時瞞唔到一世的話……

我就面對現實自己整香腸比佢食。

我係參考一個叫「日本人妻的無限創作」既食譜作者教整既。

無實際份量只有教做法，就係咁我就勇字行頭去整呢個蒜香芝士牛肉香腸。

呢個做法唔使用腸衣都做到，味道幾好、但欠缺爽彈質感

但你需要知道…世上無兩全其美，有得必有失唔好咁執著吧。

呀包見到後眼眨淚光咁開開心心食，食到津津有味。

哼~呀仔，你上當了！你媽媽一早用身教去教你，女人係深不可測的

得閒整定啲放冰格食既時候拎出來煎好方便(唔好問我可以放冰格幾耐，我都唔知的)。

你睇個香腸需然無腸衣既爽彈，但味道好好。

材料：

牛肉碎或豬肉碎    300g

生粉    30g

鹽    1/2茶匙

蒜蓉    少許

芝士粉   1湯匙

做法：

1. 將牛肉或豬肉放入冰格雪到微微冰既狀態。

2. 然後切細粒粒加入生粉及蒜蓉、鹽。

3. 撈勻後就用攪拌棒或用攪拌機打5分鐘。

4. 5分鐘後就加埋芝士攪勻。

5. 肉會變成咁樣，拎起撻幾下就開始整造型。

6. 搓成呢你想既長度就包保鮮紙。

7. 好似包糖果咁頭尾擰實，然後放入冰箱至少4個鐘令佢雪硬。

8. 拆開保鮮紙蒸15-20分鐘再放涼後可以煎佢。

9. 可以再放入冰格，食既時候先去煎，同埋再雪多次質感較好。