sales的圖片搜尋結果

(網上圖片)

昨天,同人吹水,又被問到一個核心之中最最最核心的問題:你認為sales重要啲,定營運做野果班人重要啲?大佬呀,千古難解的問題!好彩,宜家AML、KYC、compliance興起左,sales的敵人亦都多左,operation的壓力又細左,不過,細左唔等於全部消失。

話題一轉,既然,友人問得出口,那當然,他公司的sales同operation,又拗又吵又鬧又爭啦,白熱化的爭執呢。

我話:「一定係sales。因為,無生意,咩都唔駛做。」 

他說:「我知,你知,不過,啲operation唔知又唔認同呢!佢地成日覺得sales無野做,坐在office,打下電話咁,平時又唔知佢地做啲咩,得閒果時又會點佢地班人做野,又話個客要求咁咁咁,要改咩咩咩,搞到operation個心極度不滿,火花四濺呀,調停都攪唔掂呀。」

「咁點搞好呀?」

「我都唔知……不過,我明白sales跑數的壓力。」

然後,隨手,他把煙拿到口邊,大力吸了一口,煙圈徐徐地在口中吐出來,帶有半點蒼然無奈的味道,讓我想起志明與春嬌中的余文樂。

「因為,我都係sales出身。」煙圈繼續徐徐地,在口中吐出來,並嘆了一口氣。

其實,有幾多sales同operation的爭論,是源於觀點角度的分歧,定還是管理上的監督工作或因為透明度不足,而所導致出來的誤會和誤解呢?

好多人,包括老闆、經理、主管等,在管理sales時都較傾向採取無為而治,對operation卻要求甚高,非常高壓管理,而文書admin工作,因為sales一句話唔識,就由其他人來頂。正正由於這種不公平的傾斜態度,才是促成operation不滿情緒加劇,和養成sales目中無人這種習慣。

想改變方向,重新建立管理系統,整頓操作和銷售流程?當中,一定會有大中小型的陣痛,搞唔好,internal的問題引發成大問題,隨時會由內部的陣痛、變成在市場上的陣亡。到頭來,邊個夠膽問責?

如果,項目一開始果時,sales同project man係同一個人,你話幾好呢?其實,廢up溝客不易,執行項目亦難。不過,可惜,懂找客跟客而又同時懂營運操作的神人,的確係可遇不可求。好似,去旅行時的導遊和領隊,拍拖時的男/女朋友sss和結婚後的老婆,都是有明顯的分別,如果由同一個人來擔任,除非能力超高,否則,將來被客完爆的機會可不少呀!

我問朋友:「你諗到解決方法未呀?」

「賣左間公司佢,咪唔駛煩啦……哈哈哈……」煙圈再繼續徐徐地,在口中吐出來,並加插了豪邁的笑聲。