LONG D（long distance）比起一段普通嘅戀愛，無疑係好似將關係擺落一條滿佈食人魚嘅亞馬遜河流咁危險。但有時緣份嘅嘢我哋都難以控制，如果你從未試過遠距離戀愛，開始前一定會好掙扎，而且充滿疑惑，到底努力踏出第一步定係事先放棄？
雖然維繫呢段關係會好艱難，但戀愛最重要嘅係兩人夾得嚟，分享所有嘅喜與悲。即使分隔兩地，但而家嘅交通咁方便，又有唔同嘅社交軟件，唔好一下子就否定發展呢段關係嘅可能，錯過自己有機會最愛嘅人啊！
決定開唔開始之前，一齊好好思考以下嘅7件事啦！
1. 維繫呢段關係將會好困難
考慮緊開始與否嘅時候，你要清楚明白維繫一段LONG D戀愛必定會好困難。兩個人分隔異地，難過嘅時候對方唔可以即刻陪喺你身邊，掛住佢嘅時候又只可以望住個MON，或係聽到把聲等等。但艱難唔代表唔可以跨越，最後可唔可以開花結果就要睇兩個人有幾重視對方同努力維繫喇。如果仔細考慮過之後覺得值得嘅就去馬啦！
2. 每個人都加把口比意見
無論係姨媽姑姐，定係熟同唔熟嘅朋友，一知道你發展緊LONG D，一定會好似有份參與咁加把口評論，表達佢哋嘅「關心」，例如係搬晒自己喺邊度邊度聽返嚟嘅經驗，同你講對方有幾容易出軌，或者你哋一齊落去嘅機會有幾咁低。但要記住嘅係，最清楚呢段關係係點嘅人只有你同另一半，相信自己嘅感覺啦。
3. 溝通真係好重要
即使身體相隔千萬里，但內心卻可以近在咫尺，關鍵就係兩個人嘅溝通。同對方感覺關係密切唔一定係要對方喺格離陪實你，互相分享生活、了解彼此嘅性格、兩個人之間有無比嘅信任，呢啲感覺其實遠距離戀愛都可以俾到你，重點係就算有時差就者幾忙都好，都唔好放棄好好傾偈嘅機會。
4. 唔好刻意逃避關係結束嘅可能
除非你覺得對方唔喺你身邊都絕對無問題，如果唔係喺呢段關係入面，你一定會有覺得傷心、寂寞、好想放棄嘅時刻，但正因為心裡面有關係隨時可能結束嘅想法，兩個人更加會把握溝通嘅機會，加倍努力去了解同留住對方嘅心。如果抱住懶懶行嘅心態，反而可能係關係嘅致命之處。
5. 你要發揮創意
你有好多方法可以同對方分享你嘅生活，例如係Facetime、Snapchat、Whatsapp等，甚至可以突然寄一封寫滿情話嘅信，話畀對方知道佢有幾重要。你又可以約埋另一半遙距一齊睇戲或者係電視劇，睇完可以一齊討論，感覺就好似對方陪喺自己身邊咁。你仲可以花啲心思，不定期寄啲小禮物畀對方，畀個驚喜佢，令佢感受到你滿滿嘅愛。做齊以上嘅嘢，其實LONG D都可以好sweet！
6. 你仍然需要自己嘅空間
雖然你好想一直陪住對方唔好分開，有人亦會經常穿州過省為咗見伴侶一面，但要記住你都有自己嘅生活，唔好畀戀愛充塞自己嘅頭腦，無論係佢同你都好，即使好想一直保留親密嘅感覺，但都要畀對方同自己空間。唔好因此而迷失自我，咁先係真正維繫兩個人關係嘅最好做法。
7. 關係結束唔代表係失敗
老實講，維繫一段LONG D戀愛真係好好好困難，即使最後兩個人真係無奈要行到分開嘅一步，都唔代表係你哋嘅錯或失敗。就算曾經係最親密、感覺可以陪伴一生嘅伴侶，都未必可以跨越遠距離嘅考驗，所以唔好責怪自己或對方，抱住祝福嘅心迎接下一段緣份啦！
