超級工程：羅馬是怎樣建成的IV暴君的鐵腕(8) 之科林斯運河（Zannanza）

希臘科林斯運河 Nero’s Corinth Canal (公元67-68年)

現代開鑿的科林斯運河(Corinth canal)，走向沿襲羅馬時代設計

希臘地理概況及歷史背景
公元67年，長期的苛政已經令尼祿(Nero)在羅馬帝國內聲名狼藉，在此前一年(公元66年)，帝國邊陲的猶太人地區爆發反稅暴動(The great Judean Revolt)，呢場暴動將會一發不可收拾，演變成羅馬史上最波瀾壯闊既少數族裔起義。不過好明顯尼祿仲未知道自己時日無多，即將大難臨頭。公元67年，尼祿響希臘巡視之際到左科林斯(English: Corinth, Greek: Κόρινθος, 或譯哥林多)。咁到呢度我又要講下希臘既地理。希臘本土分為北面既阿提卡半島(Attika Area)同南面既伯羅奔尼撒半島(Peloponnese Peninsula)，古典時代，著名既雅典城邦(Athens)就位於北部，而另一個著名既城邦斯巴達(Sparta)就位於伯羅奔尼撒半島上。兩個半島之間，由一條狹窄既陸橋(land bridge)相連(大約6公里闊)。如果商船要由希臘既一邊去另外一邊只有兩個方法：繞經伯羅奔尼撒半島，缺點係風浪大、危險、航程長。另一個方法係響科林斯港(Corinth)落貨，或經陸路將整艘船經早期舖設既路軌(Diolkos)送到對面。兩個方法都麻煩，所以好早希臘人已經萌生開鑿運河(canal)既念頭。

希臘地形圖，桃紅色小點指出科林斯陸橋(Corinth land bridge)位置

衛星圖片中既現代科林斯運河

尼祿運河既走線及更古老既希臘貨運路軌「Diolkos」走線


公元前600年前後既古希臘於科林斯修建既Diolkos(Δίολκος)，世上最早既路軌；作為起唔出運河既折衷方案，船隻可以不經卸貨直接吊上沿路軌而行既木頭車，由人力拉6-8公里運到另一邊再落水，當中1100米已出土。

Diolkos古希臘路軌既運作方式示意圖，船下面果架係承載船身用既車，作用同火車卡一樣，沿住石灰石上鑿出兩條路軌黎行。

艱鉅工程
6公里似乎唔係好長，但科林斯陸橋(Corinth land bridge)複雜既地形令到碪探工作變得複雜同困難。要開鑿運河穿過科林斯陸橋，就必須挖開近100米深既岩床先可以比海平面既船隻順利通行。自從公元前7世紀開始，響古希臘一直都有人提出想起運河穿過科林斯陸橋，但由於技術問題一直都停留響碪探同設計既階段，冇辦法動工，呢個唔止工程量大既問題。科林斯陸橋既沉積岩(sedimentary rock)充滿斷裂線(fault lines)，唔穩定而且施工期間有倒塌危機。而建造成本過高亦都係一直都冇人起既其中一個原因。直到熱愛希臘文化既尼祿，先係歷史上第一次實際嘗試動工建造運河貫穿科林斯陸橋。

暴君的德政
蘇埃托尼烏斯(Seutonius)《十二帝皇傳》中所載，科林斯運河係少數尼祿既德政，響佢既著作中，運河既記述同佢既暴政係分開黎講。科林斯運河[亦係尼祿所進行過最大規模既基建工程，公元66年，由尼祿本人親自主持動工儀式，建築工人包括6000名強逼勞動既猶太戰爭(Judean War)戰俘。當測量師團隊利用幾何計算確定兩邊海平面既高度後，兩隊工程團隊分別由兩邊既海岸動工，挖開一條40-50米闊既深溝。如果尼祿既運河建成，呢度闊度將係1893年建成既現代科林斯運河整整一倍。第三個團隊主要由測量師組成，佢地既責任係沿運行的預定走線鑽孔碪探石質。事實上，響古羅馬時代建築行業已經達到好高既專業水平同非常精細既分工，好多測量行業分判商承接帝國政府既合同。打孔鑽探測試石質既基本原理，直到今日仲一直用緊。

尼祿運河既走線及工程已完成部分(圖左圖右)，羅馬時代測量師團隊打既鑽探孔(圖中間16條豎坑)


可能係尼祿所建既運河動工記念碑，碑上係古希臘大力神海克力斯(Hercules)既浮雕，經過二千年既歲月浮雕已經嚴重風化

突如其來的終結
尼祿皇帝將既宏圖大計最後並無完成，尼祿翌年就以國家公敵罪被處決，而工程亦都被緊急叫停。呢個時候工程只係進行左一年幾，6公里長既走線只係完成左大約700米(實際上可能唔止)，留下左岩壁上一個已經風化既海克力斯浮雕(Hercules mounement)作為記念碑。從此之後，好長時間冇人再嘗試尼祿未竟既計劃。而羅馬帝國滅亡後，更加冇人敢認真嘗試呢個工程挑戰。直到公元1881年，現代既科林斯運河先再次動工興建。奇跡地，19世紀末建造既科林斯運河既選址、走線同尼祿所建的運行一模一樣，而當時既測量師更加重覆使用羅馬人所開既鑽探孔調查石質同斷層。經歷左11年既時間，科林斯運河最後響1893年完成；運河闊度只係21.4米，當中最深處鑿石近100米深。若果尼祿既計劃更早實行，可能歷史就要改寫都唔奇。

–超級工程：羅馬是怎樣建成的第四季完–

作者：Zannanza（本文章由聚言時報授權提供）