759之有無咁多平靚正呀？（陳假）

(圖片來源:linkhk)

759 係啱啱起步嗰陣其實唔多出名，不過因為佢受到打壓，供應商唔肯供貨，事件經傳媒報導後，759名字變得廣為人知，市民亦對759產生一種鋤強扶弱心理而支持佢，幸而759老闆無做反骨仔出賣港人，佔領事件之後無學班賣港賊瀨三瀨四，仲串班友做生意唔識變通，可謂贏到唔少市民掌聲。

但係最近有報導指759開始唔想有咁多折扣，有市民對依個做法有啲不滿。不過又咁講，大家幫襯開759買零食嘅，都係鐘意佢賣啲野同普通大型超市唔同，尤其係有多啲非強國貨嘅選擇。咁我又想問下大家覺得又唔洗食強國野，又唔洗俾多啲錢依件事係咪好合理呢？

其實我唔係話怪人有依個期望，因為759依幾年都叫做到市民理想中嘅「價廉物美」，但實情係759要做到咁係行緊險着。

事情要回帶到當年759受打壓，供應商唔供貨，咁759就直接同生產商傾攞貨，不過要同生產商直接攞貨個量就要大，而759又想用「薄利多銷」同「高流量」模式經營，要做到咁，759就要擴充規模，增加入貨量去增加議價力同去貨能力，之後759一年之內（12年）由11間鋪增加到60間，至15年3月為247間。佢點可以一時間谷到咁大？錢從何來？林老闆無學似其他上市公司屈啲股東供股，但係見到11年後759嘅負債比率大大增加，仲係每年咁增加到15年超過100%，咁我相信佢係因為擴充而愈借愈多錢。

另一險著就係薄利，佢薄利到賣100蚊賺得$1.6。利潤率咁低對759其實係危險，簡單啲睇，利潤=營業額-費用，如果兩個因素有咩依郁都好易令到佢賺少好多，甚至蝕錢，見下圖就係例子。

要知道759唔似得誠哥超市或者惠康咁有地產商照，上年40間鋪續租，得一間鋪象徵式減$5000俾佢。

http://hk.apple.nextmedia.com/financeestate/art/20151014/19332196

由於今年經濟預咗差，咁759老闆自己都話唔睇好今年銷售，再加埋日圓升值風險會令佢利潤率更低。睇番佢15年半年結，雖然營業額有增加，但係費用同時增加而令佢利潤少咗50%。依家借落咁多錢，如果賺少一大節甚至可能蝕嘅話，咁還咩俾人呢？唔知有無人仲記得當年嘅大大公司，佢最終命運就係因為借錢太多， 擴充過度，後來俾銀行 call loan 而變成集體回憶。

依家759要救火，所以想停止折扣去增加返個利潤率，咁我係寧願佢賣貴少少都覺得好過幫襯強國貨嘅，我覺得佢之前為求平而入多咗強國貨係有啲走錯路。

簡單啲總結，太著數嘅野都好少維持得耐，好似當年百佳／惠康割喉戰咁，消費者的確係享咗一段時間嘅平靚正，不過最終兩間大場都發覺無肉食，大家有「共識」就結束割喉戰，而講到759嘅廉價物美時代又可以頂幾耐呢？今年零售市道唔好佢又過唔過到關呢？

作者：陳假（本文章由聚言時報授權提供）