GOOBNE CHICKEN「隊」雞．食評（時來風）

上次去左Pizza Bar食好西，今次小編就同班朋友去左食韓西－ GOOBNE CHICKEN，係尖沙咀同旺角都有一間，不過小編就去左旺角食，方便丫嘛！

GOOBNE CHICKEN會提供手套同掉骨筒，不過得一隻手套，單手「隊」雞表示「輕鬆」（-_-）呢間餐廳係有真．韓妹、真．韓仔，落單要同佢地講英文，但同時都有好多偽．韓妹。

GOOBNE CHICKEN當然以烤雞為主，咁就叫左個香酥烤雞、蜜糖咖哩烤雞同埋雞串。

先講香酥烤雞，香酥烤雞烤得非常之乾，小編反而覺得烤得乾都幾特別，幾脆，不過味道方面，就淡而無味，一啲味都無，好想問佢有冇痷過、好想問佢拎啲鹽！

雖然側邊仲有啲芥末同咖哩醬可以增番啲味道，但啲醬食落好奇怪，同個烤雞完全唔夾，隔泥有碟細心既酸蘿蔔解辣（我同個frd食完啲酸蘿蔔立即面容扭曲！）

蜜糖咖哩烤雞比香酥烤雞好食好多，不過咖哩味唔濃，蜜糖味重啲，醬汁好入味，質感一般，都烤得幾脆。小編同啲朋友用啲蜜糖汁點番岩先食個啲香酥烤雞XD

呢個雞串係最好食，醬汁好惹味，大蔥令到雞串更加香。重點係雞串下面有濃厚既芝士，係鐵板燒得燶燶地，拉啲芝士上泥拉到好長好多好厚，再搭埋落啲雞串度，真係一流！

另外，小編仲叫左芝士雞蛋卷，一層層厚厚既雞蛋包住紫菜、芝士、青瓜、火腿和粉絲。食落口，雞蛋好鬆軟，有別於平時食開既韓式壽司。

韓國食炸雞當然配啤酒，小編就叫左Somersby Apple Cider同埋鯊魚眼淚酒特飲。

反一反轉枝Apple Cider，就價值＄88

岩岩好姐住左小編個大樣XD

Somersby Apple Cider我諗唔洗特別介紹，鯊魚眼淚酒特飲味道酸酸甜甜咁，同食烤雞都幾夾既，不過就好似藥水味，隻鯊魚幾得意，但味道就好一般，好睇唔好食！

說實話，反轉枝酒咪又係咁既味，但小編就好唔中意佢溝咁多冰！本身Apple Cider 酒味都唔濃，仲要溝咁多冰，就變左飲藥水咁。

總括泥講，成餐飯都係瘋狂「隊」雞～～仲要單手！

不溫馨提示：如果唔想排隊，最好6：30左右就去定；可訂座；蛋糕唔收切餅費；價錢不平民，最好叫埋一班朋友些牙。

P.S 叫左咁多樣野盛惠九百幾，小編同6個朋友些牙都係二百蚊有找。

作者：時來風（本文章由聚言時報授權提供）