爆機未呀？（WaitWait）

近日出現既魚蛋革命，唔少政黨紛紛出黎表態，讉責參與者暴力與其割席，不太跟貼時事既朋友，唔愛街頭放火然後發表自己接受唔到，其實我都不感意外。

但意外既係有朋友講係乜野對準政權，要打幕後大老虎先係正道，唔好搞D前線人員，佢咁講一講，原來我就諗到一隻經典遊戲來比喻現今香港既狀況。好不幸，小弟不才要用手指寫字，加上部iPhone 6 Ram唔夠，Facebook 彈app乜都無曬。既然咁，不如試下投稿等多D人睇下有冇同感。

果隻經典遊戲叫Super Mario Bros，相信大家無玩過都有聽過。遊戲好簡單，未開始就話你聽原來你有位心儀既公主，宜家俾大舊衰既恐龍搶走左，佢宜家就要去救公主。點救公主，好簡單，不斷向前行，搵到個大舊衰Ko左就攪掂。因為只要你成功見到隻大舊衰，避開左佢既攻擊，走到條橋既對岸，系統會自動幫你斬斷條橋，大舊衰就會跌落去，成功救左公主。

講左咁耐，究竟同對準政權有乜關係，最重要想表達D乜呢？

好啦，有玩過既朋友都知道玩既過程中，會遇上唔同敵人拎唔同道具，其實依D都同打倒大舊衰冇直接既關係。途中你會食到金幤，變大/1UP草菇，甚至無敵星星，依D道具全部都同打倒大舊衰冇直接關係，拎到無敵星星都唔可以帶到最後一關先黎用，唔通見到唔食？敵人方面，全部敵人有一個共通點設定，就係佢掂你無事，你掂佢就要死。前期要順利去前行，一係迴避，一係面對佢，前期大部分敵人都可以用腳踩佢死佢。

最常見應該係烏龜，正常烏龜既行動模式係在指定地點行來行去。開頭的確可以避開曬龜向前行過版，但中期就要踩龜拎龜殻打倒你阻住你前進既敵人。常見既情況有食人花出現黎對岸既水管，而依條水管就係唯一既落腳點。如果你唔殺食人花，一係企定定等運到，多數Time over又冇左條命，一係就咁跳過就俾佢咬死。係，可以等佢縮埋先你先跳過去一陣再跳，但係第一次就咁玩仲唔知前面仲有乜，技術同經驗話我知咁樣玩失敗既可能性好高，因為佢會好快就伸番出黎咬死你。雖然係家用遊戲，可以無限重玩，但由於冇得中途save而且要做功課同返學，唔喺途中拎多D道具有D分儲多少少命係連去World 8-4 見Boss既機會都冇。

當年一班小朋友約出黎食野吹水講打機，總有D人誇誇奇談話自己好勁呀可以唔死一條命走到4-1。當年冇Internet ，最多有game書睇，所以果D人就表演走捷徑跳關去4-1。之前未見過既的確會好驚訝，但係當真心鍾意長期打機既人就好快就分辨到果D人出黎，好快就唔同佢地玩啦，因為果D人玩Mario就係去到4-1然後就停左係道，之後唔識過。因為佢地只係照抄人地點玩，但佢地連基本正正常常咁到達World 1-4既能力都冇，冇得曬命，冇引自然唔再出現。

不過就算真心鍾意玩Mario又未爆過機既人都有分兩批，有一批就好似我咁既，總之可以爆到機既方法都會用，最重要爆到機；另一批就要華麗/完美過版，接受唔到即使中招都要向前衝既過版方法。攪攪下成日傾到面紅耳熱，你話下我我又話下佢，最後當然自己返屋企繼續玩啦，大家都係以鬥快爆機為目標，最後都唔記得邊個爆機先啦。

去到拜年，當年細路雖然唔會俾人問人工幾多，結左婚未，但總有一啲驚你悶就扮曬nice既親戚主動R水吹，一般都會問我最近做啲乜，每一次答都只會係打機。如果下一句問玩緊乜野game，依個親戚可以真心傾落去。

如果問爆左機未？我只會笑而不語。

人生如打機，打機如人生。追求香港民主既路係好長，過程有好多未知數，住得係香港就要玩依隻game，個game既設定就係咁口話鍾意香港有民主，都有分唔同類別。

1.平日都唔多點理政治既，一有大件事就一知半解咁亂噏野，依批人講既野基本上可以無視。
2.從未鬥爭過，聲稱自己追求民主，但連基本達到民主要付出乜野都未知，一直吹噓自己成就而不再向前走。
我地要認清要遠離依批人，因為除左無助大家去前走，更加會以熟賣熟零付出，偷取你辛苦努力得來既成果當作自己既成就。
3.目標方向一致但去到細節位有分歧，就好似玩Mario洗唔洗完美爆機既爭論，根本完美本來就有不同定義，又或者根本有人只需爆機唔理自己玩得幾落魄。雙方間中可以交換意見但不宜互相指罵，互相指罵都唔會對件事有幫助。

最後，雖然大家仲未爆到機，途中一定聽到「打機囇時間」「爆機未呀？」「轉Game啦，你爆唔到機㗎」依啲冷嘲熱諷既主旋律，但只要玩緊既人有心繼續玩，就好似魚蛋革命咁。用左好多時間同條命終於去到1-4 殺到細Boss，救到隻菇，過到第一版。

雖然未爆機，但起碼唔洗無限卡關冇曬希望先。

只要有希望，我相信我地不久將來一定可以成功爆機，救番公主嘅，共勉之。

P.S. 第一次投稿，亦可能最後一次，文筆唔順請多多包涵。

作者：WaitWait（本文章由聚言時報授權提供）