紅色佛門（化水）

十二月有幸初次參與大嶼山寶蓮寺舉行幾日幾夜嘅水陸法會，係法會當中得悉一啲佛門近況後，實在不禁有啲感慨，特意撰文向大家講述。

於我第一日參加水陸法事，我發現禱文上出現為「中華民國…大總統…副總統」祈願嘅禱文。當時心生一喜，難道寶蓮寺仲處於中華民國陣型？後來立即發現，係自己諗多左少少。從中華人民共和國請嚟嘅法師，以北國國語直接將「中華民國」改成「中華人民共和國」。可笑嘅係，後面繼續用「大總統…副總統」等民國官銜。呢個咁滑稽場面，竟然所有人跟住念念有詞，完全唔察覺有問題。同樣場面，係往後嘅法事當中次次出現，筆者都已經見怪不怪。事後問及得知，原來主持這次法會嘅法師們經常巡迴（包攬）香港澳門大部分法會。北國法師來港主持法事已經係恆常之事。筆者乃係法會初哥，法會是否完整同嚴謹，絕對係一無所知。不過，係某些參與法會嘅師兄得知，寶蓮寺有一位香港法師主持法事十分嚴謹同講究禮儀，至少比今次主持法事嘅法師嚴謹。雖然深感疑惑，但係亦無考究，水陸法會乃係重大法事，為何今次唔用較嚴謹嘅香港法師呢？

於法會尾聲嘅午飯（有一個特別嘅名詞，不過筆者忘記左），有位寶蓮寺嘅和尚向在席人士道謝，並且說明一下寶蓮寺嘅近況。原來寶蓮寺換了住持，一位由北國湖南空降嘅和尚，接替左前任住持。當然前任住持經已年老，亦自覺不能勝任住持嘅工作。新任住持有兩項發展大計，第一、與騰迅等北國紅色資本科技巨擘合作發展網上佛學課程。第二、於北國設立佛教學院，為香港佛門招攬新血。

筆者原先只係顧住玩手機，但係聽到呢度不禁心寒。大家可以想像得到香港嘅寺廟只有講北國國語嘅僧人嘛？眾人係佛堂中誦經念佛，為極權背書，卻渾然不知。捐錢做法事，只係將你地嘅錢轉移上北國公司。要發展網上佛學課程點解唔搵香港公司？要招攬新血，為何唔招攬香港人？原因顯而易見，佢地在意嘅並非於香港宏揚佛法，只係在意於換血!

坦白啲講，香港佛教真係要自己救，又有邊個信佛嘅家長自己放棄繁華俗世，或者支持自己仔女去出家呢？香港佛教早已染紅，完全變紅亦都指日可侍。可能又會有啲佛教徒話，「宗教還宗教，政治還政治」或者「你係咪信佛先」，其實係一個無神論國家底下發展嘅宗教，除左政治同經濟原因之外仲有啲咩？