回鄉證？要黎托咩。（毛言地）

身為一個香港人，喺香港出街要帶身份證，北上要有歡樂卡基本上每個人都要知。就好似早排好多因為唔同政見而被取消回鄉證嘅人上唔到中國，係因為佢張回鄉證已經冇效所以過唔到境。有回鄉證係你可以上中國嘅唯一原因，因為我絕對冇可能唔帶回鄉證就平安無事咁過到羅湖口岸，本來我以為係咁樣。直到銅鑼灣書店五位負責人出事，我先覺得大家可以扔左你手上張回鄉證。因為你有證唔代表就可以去到中國，同樣你冇證一樣可以無啦啦出現喺中國，咁到底張回鄉證實際上有咩作用？

李波一句要配合中國入面調查就可以用「自己方法」上左大陸同時香港執法機構居然冇一個人知（又或者知嘅都唔敢出聲），我相信日後過關只要講一句「我喺上去比公安查」會比起你SHOW張回鄉證比佢睇更方便快捷。一個香港人冇出入境記錄而出左境，入境處、警察、連特首都可以懶懶閒咁講幾句話做緊野就算數，又冇諗過去救自己友，又冇當平時捉犯咁捉，真係會令人覺得原來偷偷出境真係好似飛虎出征咁兒戲。其實由梁振英當選開始香港已經唔當係一個由法治管理嘅地方，只係香港人自律開一時未接受到。喺依方面香港人就真係唔夠大陸人玩啦，視法律如無物方面佢地真係贏足九條街。

成日話中國已經好左好多變到好「文明」果班人，可唔可以話比我知點解強國式軟禁咁快就已經殺到落嚟香港，搞單咁嘅白色恐怖出嚟？李波佢地做錯咩事？唔通因為賣講中國內鬥嘅書就足以招致生命危險？如果中共唔係身有屎點解要咁緊張，全世界都數緊中國不是嗎，點解中國講到自己軍事力量咁強大，中陸網民吹到三分鐘搞得掂日本，對住外國就郁人地一條毛都唔敢，反而對住香港人就玩埋啲咁嘅招數？早前ISIS咪殺左個中國人質嘅，又唔見你派個公安拉個聖戰份子返中國受審嘅喂？中國唔係話乜都要講法律，乜都要跟足基本法辦事咩，唔係話要加埋網絡廿三條限制香港人自由咩（係啊，今日又嚟料啦，唔好唔記得），咁公安嚟綁架香港人又係跟邊條條例做事啊仆街？

李波依件事件已經好離譜，吳亮星條老屎忽更加語出驚人。話咩五條友只係偷渡上去叫雞？冒咁大嘅險就係為左做八成麻甩佬日日拎住回鄉證大搖大擺上中國做嘅事？你以為全世界都似你咁低能咩吳生。為左盲撐中國，吳生你今次都真係去得好盡下，係咪想下次有黨嘅照顧，介紹個正啲嘅姑娘比你偷偷地上去食？見到立法會比咁多錢去養住依班廢人，香港納稅人點解仲可以不為所動？香港而家好大件事，你瞓醒未啊，港豬？

一個讚好，是對我的一點支持。

如果想分享給其他朋友的話，請標明出處並附上專頁網址。

圖片：網絡取材，後期加工

作者：毛言地（本文章由聚言時報授權提供）