廢青廢在睇王晶（柳臣）

最近大家都係度討論王晶到底成唔成功，有人話有錢唔等於成功，有人話大家價值觀唔同，有人話佢拍垃圾屎尿屁電影。

不過各位廢青，到新年期間咪又係一家大細入戲院比錢王晶洗，睇佢繼續拍垃圾片？佢咁有錢咪又係咁多年黎香港人一代代咁供到佢肚滿腸肥？
你再唔認同佢既價值觀，都有權決定「香港主流電影，電視價值觀」既，正正就係垃圾屎尿屁。最後有say去傳播宣揚香港精神既，正正就係垃圾。

如果而家你要問我咩係香港精神，我會毫不猶疑咁答你：就係「垃圾精神」。垃圾精神即係一種戀劣既精神。呢種戀劣就係由一班食老本既有錢垃圾，通過製造更多既垃圾，去餵飽全香港既垃圾。

王晶之所以有資格視所有青年人為廢青，源於佢知道無論佢講咩垃圾言論，拍咩垃圾電影，青年人都制裁唔到佢。賭城翻炒翻炒再翻炒，由肥螳螂打到飛啤牌。基本上只要放番幾個大名星係套戲度出現，話之王晶拍咩香港人都肯睇。

你食垃圾，又點可以話自己唔認同垃圾呢？

無錯，你可以繼續用把口係網上面話佢唔成功。但你唔認同佢唔會令到佢有一毫子既損失，只要你／你既朋友／你既家人繼續供養佢。
要令到一個人收皮，就要擊潰對方認同既價值觀。

王晶相信：「廢青根本傷害唔到佢」，「拍垃圾都有人睇」，「廢青屌完都會繼續比錢佢洗」。

賭城風雲3有周潤發、劉德華、張學友、張家輝。所以王晶好老定覺得最後大家咪又係睇完影低張電影票post上instagram打句：「支持發哥先睇。」

點解佢會可以咁串？點解佢可以當所有廢青無到姐？因為廢青有前科架囉！好幾年前，個個拍曬心口話罷睇ＴＶＢ，結果呢？咪又係日日追「my盛lady」？咪又係一知道子華攞視帝就瘋狂洗版？

說好的骨氣呢？廢青少少骨氣都冇，「人必自侮而後人侮之」唔怪得被上一輩睇死架喎！

賭城風雲II係香港首周票房港幣1413萬元，如果王晶今次票房都仲可以攞番呢個數，咁就證明香港不論廢青，廢中，廢老都共擁同一個價值觀—

同一種香港式垃圾精神。

作者：柳臣（本文章由聚言時報授權提供）