網絡23條，打擊網上言論自，阻止思維革新（陳假）

網絡23條問題就係「刑事」

其實唔只係改歌或者圖，如果政府睇完你篇文或者 Facebook status，佢覺得係侵權，縱使原作者唔反對，甚至係無原作者，只要政府搵到類似言論而又有版權的，政府就可以拉人。再做得毒啲，政府可以老作定一大堆野，攞定版權，政府就可以用萬能key要拉佢想拉嘅人。無錯，我的確對現今政府執法非常無信心，甚至認為已淪為政治工具。

至於現時草案中嘅豁免元素 ，戲仿、諷刺、滑稽、模仿或評論時事等，以上因素如何斷定就非常主觀，你話我依家講嘅野係咪戲仿？係咪評論時事？邊個可以講到準則？有人話我依家係度亂咁鬧人都仲得。所以依件事唔只係創作人嘅事，而係言論自由嘅事。

做咩要先攪網絡23條收緊網絡言論呢？

係網絡上面宣傳理念，唔需要受到主流傳媒掣肘／統戰，而主流傳媒亦明顯偏幫某啲陣營。網絡可謂一個低門檻又自由度高嘅宣傳渠道，好多嶄新觀念一開始都係無主流媒體談論，網絡就成為咗嶄新理念嘅傳播渠道。係香港，社運上面就係有好多理念都被主流媒體冷處理，甚至攻擊，網絡就成就依啲社運理念嘅主要宣傳渠道。舉個例，本土理念得以醞釀，就係靠網絡傳播，至今可謂對香港社運思維做成重大啟發，今次政府就係要將依個渠道堵塞，令香港社運理念裹足不前。

作者：陳假（本文章由聚言時報授權提供）