哪個呀頭不頭痕（傲將軍）

每逢年尾、季尾，望住堆數，再睇吓條Team，上氹老頂下湊細路嘅呀頭都不其然搲爆頭。

對上，一堆KPI，又多又亂之餘，仲要離地萬丈難以達到，老頂又一時一樣，逼得太緊，Resource永遠唔夠，巧婦難為無米炊。條Team唔聽話，入你數；下年計劃保守，被照肺；之後理想太宏大，又怕使命不達，上意難測，以為自己做緊公公。

對下，o靚仔A愛射波，Intern B無常識送大鑊，靚妹C得罪人，攪到Senior D嗌走。無為而治養大家各自修行嗎？背後有人說力有不逮；手把手教日日睇進度嗎？又有人話Micro-management太嚴苛。一個唔覺意見到偽文青鬧人唔識做人呀頭（註一），睇FB都怕要對號入座。

KPI追唔到，上面捽；下面人事問題多，做野唔上心但有離心，甚至信都遞埋。
「孩童只盼望歡樂　大人只知道期望」夾係中間的小頭目，見住九十百萬野衝埋嚟，仲要防隔嚟Team暗箭，壓力太大，真係一籌莫展。

想找樹洞呻嗎？
對公司了解、識有關同事嘅，驚唔係好對像，一怕傳回耳中，二怕形象有損，三怕利益衝突，說不得；
對情況不了解、唔識啲人嘅，更加唔係好對像，講嚟都唔明，明完朋友又唔識安慰，到最後煩惱只能一兩句輕輕帶過；
回到家，跟枕邊人訴苦嗎？大家在外大半天，都累得相顧無言，無謂再加負能量，嘆一口氣倒頭便睡算了。

到最後，自己的問題只能自己拆。
繼續捱嗎？只好慨嘆明明我已晝夜無間踏著面前路，在這無間地獄不斷輪迴；
轉工嗎？
轉到不用帶人吧？又心不甘，且失去幫手總難以習慣？
轉到同等級繼續做頭目嗎？闖蕩江湖日段日子的，誰不知道天下烏鴉一樣黑，與其出去重新適應，就會想到做生不如做熟，靜待到天明；
自己開檔做生意吧？回頭不是發覺自己沒有了那份衝勁膽色，就是還沒有那本錢。

細個學「條條大路同羅馬」，大個先知條條絕路，唔係呀嘛？

日積月累，你總會感受到這個智理：
When top level guys look down, they see only shitheads;
When bottom level guys look up, they see only assholes…
何時、何地、何人，這都是永恆真理。
幸而呀頭關關難過關關過，慢慢地成熟，有幸一級一級上鍛鍊的話，手腕及脾氣就會逐漸變得強大，就會學懂The Greater Power, The Greater Responsibility。

說到底，呀頭磨練到身心強大，就要Patience You Must Have。
將軍僅送給做呀頭的朋友。

註一）將軍精神分裂之作：你唔識做人阿頭就走啦
http://www.passiontimes.hk/article/05-21-2014/15318

再嚟神又係我鬼又係我講曬啦嘅延伸閱讀：
真荒謬，把工作看得那麼高
http://polymerhk.com/articles/2015/11/25/24612/