荷蘭姓氏：雲（van）、雲達（van der）（曉高臣）

提起荷蘭，「風車」、「毒品」、「同性戀婚姻」、「華人黑幫」、「烏鴉隊冧蔣天生」、「Holland Bank Cheque」、「陳百祥荷蘭叻」……呢啲自然成為我衝口而出既詞語就係我對荷蘭既印象；而提起荷蘭足球——「二奶命」、「告魯夫」、「十上十落（全攻全守）」、「阿積士燕豪芬飛燕諾」……都幾多野講，其中「雲姓氏荷蘭球員」更成為我成日會講既話題。

自問係一個缩骨算爆老撚土既廢青，返工最鍾意吞pot蛇王同屈同事食飯。公司入面總有人標榜自己足球知識豐富，於是我就成日走去挑人機，「雲/雲達姓氏荷蘭球員」成為我拿手好戲。

我：「講荷蘭雲字頭既球星，一人一個接龍。講唔出就請食飯。現役五大聯賽個d我唔會講。」
同事：「雲佩斯」
我：「雲拿保」
同事：「雲邦荷斯」
我：「雲荷當」
同事：「我點知你講個d堅定流呀！雲邦美。」
我：「仆街你唔識Google既，視力有問題唔使睇醫生既。雲安賀治。」

……

同事：「雲佬。」
我：「雲達美迪。」
同事：「雲巴士頓。」
我：「雲達韋爾。」
同事：「雲達華治。」
我：「雲布基倫。」
同事：「雲達沙。」
我：「雲耶馬雲布廷雲加……呢啲都唔啱，雲高爾！！！」
同事：「OK U WIN。」
我：「雲安賀治，雲堅基爾，不過呢兩個踢過英超。之前俾人炒魷魚既國家隊教練叫雲馬維克。」
同事：「Sorry，今日遇到痴線佬，下次再戰。」

PS：利申，其實好多荷蘭球員我都唔熟悉，靠大家先記得d名。

作者：曉高臣（本文章由聚言時報授權提供）