樂視投英超 實為紅色資訊開路（我們是魚拉突）

樂視投得香港區英超播映權似乎已經變成事實，而樂視亦已經係網上展開左空前既宣傳攻勢，扮本土，高薪挖角，拉攏球迷會，咩手段都出齊，但依然改變唔到樂視係紅色資本既事實。我們是魚拉突既立場好簡單，就係反對紅色資本入侵本地媒體市場。我地改變唔到佢投得英超播映權既事實，但我地絕對可以拒絕比錢佢賺，要佢拎幾十億打直行入黎，蝕返轉頭打橫抬出去。

比得幾十億出黎買英超播映權，一係就想賺大錢，一係就係另有打算。而家江湖傳聞樂視會用低價優惠月費「惠贈」球迷，喂，你以為樂視開善堂？大陸財團良心發現？一定係有其他目的啦！要將收費電視打入某個市場，獨家轉播最受歡迎既體育賽事絕對係公式化既招數。無論係當年有線，定係遲幾年既 Now TV，都係以獨家轉播英超黎打開入屋既路，隨後既就將會係新聞，綜藝同劇集等等。以此推斷，樂視肯肯定係想以英超開路，打入香港市場。

作為香港人，反對中港融合是常識吧。今日樂視財大氣粗買起英超播映權然後以貌似優惠價轉播英超，將樂視收費電視服務打入左香港家庭市場，有如開左條大直路比佢輸入劣質大陸文化。細嘅咪係大位細位用多啲大陸潮語，個個星期不停講，講到你都不為意講埋一份，到時就中港一家親。大嘅，就留返你自己諗。你比得巨人踩一隻腳入黎，佢自然會用埋另一隻腳去踩死晒其他本地收費電視服務。係HKTV vs TVB 既一役入面香港人已又輸左一場，港視而家電視業務已經半收皮。今次呢一場，香港人一定要贏。堅決拒絕登記樂視。

仲有呀，一間大陸公司，紅色資本，係度扮香港本土真係好噁心囉。一味係度吹奏「切爾西？車路士就車路士啦」，「貝克漢姆－>碧咸」，將一d 理所當然既野當係開心大發現咁拎黎做 Gimmick，上你當都硬膠啦，一時唔偷雞就想做保長 :o)。仲有呀，「莫翠天指樂視香港逾95%員工是港人」，話你知，呢d唔係香港人，係「新香港人」。知情人士透露，呢班大多數一係就大陸落黎爭港人學位冇上返去，一係就上左大陸撈唔掂落返黎。就算你拎住香港身分證又點先？而家政府高層班港人又好代表到香港人利益咩？所以話「逾95%員工是港人」根本就唔係賣點。知唔知點解要扮晒本土？咪就係因為佢唔係本土囉，所以話，射落海都唔幫襯佢啦 :o)

同埋而家搵波睇既途徑咁多，要睇波根本唔洗幫襯佢。總之唔講咁多，要佢拎幾十億打直行入黎，蝕返轉頭打橫抬出去。

Footnotes    (↵ returns to text) 魚拉突，是英格蘭球會曼聯的英文名稱Manchester United中的United被譯成中文讀音 　摘自香港網絡大典↵

作者：我們是魚拉突（本文章由聚言時報授權提供）