香港足球即係香港政治（柳臣）

香港足球，講起呢四個字，今時今日大家會諗起咩？ 鄭智？葉鴻輝？０：０？甚至最近最為香港人津津樂道既３：２？ 呢篇文，想同大家講返香港足球既過去，再睇下點解而家會突然hit番。 曾經，香港足球係亞洲首屈一指既年代。一班而家我地再講起足球既時候都唔會再提起既人名：黃志強，姚卓然，張子岱，胡國雄。 香港產出一個又一個足球明星，只係到左今日，香港足球員？難聽講句仲慘過乞食。 點解會有咁大既變化？反觀其他亞洲地區的實力卻不斷上升，香港隊慢慢成為魚腩。 係網上隨便搵左下資料，唔難發現香港足球係亞洲發展最早的地區球隊，在1900年左右已經開始發展。香港足球有超過一百年既歷史，1940至1969年香港足球進入黃金年代既時候，中國既足球連聯賽都未有，中國係五十年代甚至要靠香港球員代表中華民國奪得亞洲冠軍。 但係到左今日，香港要千辛萬苦，先可以同中國打個和。呢個落差不可謂不大。 要數香港運動界發展問題真係有排都講唔完，大家都覺得搞運動冇出色。 搞手冇心機搞，又鐘意圍威喂。全職運動員又搵唔到食，生活困難。設備場地又冇人理，球場爛地周圍都係。 結果愈搞愈縮，觀眾慢慢流失，連自己人都唔想睇本地既運動。 689一句體肓界冇經濟貢獻，好似係判詞一樣為香港運動蓋棺。

直到近日，香港足球先復活過來。唔通香港足球真係突然間突飛猛進咗咩？當然唔係，港足呢幾場比賽有咁大既支持同回響，一黎同中港矛盾有關。有花生自然有曝光。 但另一方面，我認為好大程度亦係因為港足踢出香港精神。 中國隊係比賽前出咗張海報公然挑釁香港隊，網上亦有唔少言論要大炒香港隊。 但香港隊冇被人睇死，門將葉鴻輝當時話：「香港愈畀人睇死就愈要有表現，就算今次我贏唔到，我都要阻住你出線。」 正正係呢種被人睇死就更加要出番一口氣既拚勁，反映出香港典型打不死精神。令到港足同香港人重新連番埋一齊。 港足係唔勁，但係有骨氣，而且堅持到最後一秒。 唔單止同中國打和，係同卡塔爾比賽既時候，仲係臨完場前2分鐘成功連追2球，踢到最後一刻都冇放棄。 呢種不屈不饒，相信自己，正正係香港精神。

反觀香港人今日被警權欺壓，被水貨客連番挑釁，又有幾多香港人有呢種香港精神呢？ 香港隊做到，香港人都做得到。 香港隊可以挑戰中國隊，香港人亦都有能力去挑戰中國政權。 「香港愈畀人睇死就愈要有表現，就算冇能力打倒共產黨，我都要搞到你坐立不安。」

作者：柳臣（本文章由聚言時報授權提供）