【千年難題】行動同文宣，邊樣重要啲？（林璃蝶）

行動同文宣嘅爭執已經唔係第一次，感覺好似返咗去一年前，大家都仲好樂此不疲咁討論行動文宣邊樣重要啲。大家一直將「行動派」同「文宣派」（or鍵戰，whatever la）二分化，覺得會行動嘅人就唔會寫文，寫文嘅人唔會行動。但係現實係⋯⋯

佢哋根本係同一班人！ 佢哋根本係同一班人！ 佢哋根本係同一班人！

因為好重要所以要講三次！

咩叫同一班人﹖簡單來講，寫文嘅人當中其實有行動，行動嘅人當中又會有人寫文。

其實筆者同寫手（or作者，whatever la）朋友去集會、佔領、光復嘅次數唔少，呢班寫手朋友係網上有筆名，有人係寫潮文、有人寫時事、有人係製圖⋯⋯佢地都幾企得唔後㗎，但係佢哋係網上唔出樣、無組織，行動時亦戴哂口罩，所以行動咗都唔會有人知，佢哋亦唔需要上報呃光環。有好多寫手點解寫得出咁多左膠惡行，係因為佢哋好耐以前已經開始去過左膠遊行、六四集會等，所以先寫得出啲集會有幾鳩流嘛。就正如我上年9月寫嘅《第一次示威，有咩要注意﹖》，正正係因為926同927我去完政總發現好多人裝備不足而寫嘅提醒。我唔知我篇文幫到幾多行動新手，但係我相信至少有會一個。只要幫到一個行動者，我嘅心思就無白費啦。

再掉返轉啦，所謂行動者，其實都係靠Facebook宣傳event，甚至有啲自稱勇武嘅本土組織都有網台節目同埋自家網站收錄文章，呢啲唔係文宣係咩？你又會唔會話佢哋做呢啲係「鍵戰」呢？根本所有行動都係透過Facebook廣傳而得知，行動之後嘅檢討、聲明、譴責等等，全部都係「文宣」。最吊詭嘅係今日有人寫咗篇文屌鍵戰，但係明明自己打呢篇文嘅時候何嘗唔係一個「鍵戰」？

所以有人批評我係鍵戰嘅時候我覺得好好笑。你又用緊鍵盤，我又用緊鍵盤；你有行動過，我又有行動過，明明大家都一樣，沒有誰比誰高尚，咁點解你係前線勇武行動者而我係匿喺電腦後嘅鍵戰？當然，有啲人會比較側重行動，有啲人會比較側重文宣，但係極少只有「純行動」同「純鍵戰」嘅人，好多時真係a mix of them。咁點解會有個假象，有啲人係「行動派」，有啲人係「鍵戰派」呢？其實睇下你自己想用咩title自居啫。你肯出樣、有組織、有support，咁啲人咪覺得你係前線抗爭者。例如我啲寫手朋友，蒙哂面行得好前㗎，但係佢地唔會喺Facebook轉個自己戴哂裝備嘅pro pic，或者唔會係About me寫住「曾在 旺角 搬鐵馬」咁樣嘅嘛⋯⋯但係你睇到佢網上寫文，咪有個假象覺得佢係鍵戰囉，其實佢哋都係「無名義士」一份子，但係就比人話係鍵戰，係咪好好笑呢？

個所謂社運圈其實真係好細㗎咋，你估真係大到可以分到「行動派」同「鍵戰派」咩？你去多得光復都知，來來去去都係嗰啲人⋯⋯「咦，乜又係你呀？」真係唔洗約埋都會撞到！

我再重申一次，我唔係要分化咩「行動派」同「鍵戰派」，因為好多時候佢哋係同一班人，做緊同一樣嘢，邊有得分化啫？我絕對唔同恴「鍵盤戰士係行動者嘅衣食父母」，亦覺得寫文去屌鍵戰呢件事好諷刺，因為所謂「行動」vs「文宣」根本係偽命題，我打呢篇文就係想大家唔好再浪費吉一個唔存在嘅稻草人啦。

結論：

1. 行動同文宣，邊樣重要啲？ —同樣重要，密不可分。但係你無可能24小時行動，唔行動個時咪寫下文。兩樣真係可以一齊做㗎。我都好歡迎以「行動者」自居嘅人得閒寫下文㗎。

2. 行動需唔需要多啲人？ —要，絕對要，實唔會嫌多㗎。

3. 文宣需唔需要多啲人？ —暫時足夠，但絕對唔可以完全無文宣。

行動係高成本，寫文係低成本。無行動得文宣又係死，無文宣得行動又係死。我同意而家行動係唔夠人呀，我都好想多啲人企出嚟㗎，但係屌人鍵戰就真係捉錯用神，而將文宣睇得太高而貶低行動就更加錯哂。

最後一句，唔好拗啦，自己人打自己人，真係邊個最開心。

作者：林璃蝶（本文章由聚言時報授權提供）