健吾：合約老師心事

關於合約制老師既事，在電台說了很多。也許，很多人都忘了在星期日晚，不想聽電視上播著荒腔走板的老牌歌手唱歌，他們是可以開收音機，聽聽我在做什麼的。這也是我在星期天晚上九點至十一點做節目的其中一個重要原因：為香港人星期日晚上提供一點娛樂。

合約教師的事，我說過很多。也有很多合約教師給我故事。也許，在這兒慢慢說給大家看看好了。

（一）

"見到d ta 書又要教，活動又要帶，課後補習班都要跟埋，平時仲可能要整教材。做既野十足老師，計埋係屋企既工作時間，人工仲衰過做7/11，做保安都高過做ta啦

教協之前個調查講得好呀，依家連ta都pgde + 碩士。

想做老師？都唔知等幾多年，做到老師都唔知幾時做到perm。一過30歲都做唔到perm，其他學校就覺得係你問題。

想轉行？HR一見到有pgde就第一時間screen 走左。

想養家想買樓？年年合約，年年搵工，連銀行都唔借錢比你買樓。

出生率下跌將來大把老師比人炒。

學校人事又差，學生做得唔好又比家長、校長鬧。

你仲想做老師嗎？理想同現實永遠都係唔同嫁"

（二）

之前個星期，聽到903國民教育，阿方丈訪問阿韓連山老師。韓老師話，教D小學生抗爭。話學校如果通過左一條校規，唔畀學生頭髮過長，唔畀學生書包上面有飾物，面對呢D無理既規矩，就要出黎抗爭。佢係咪痴線架？抗爭？你知唔知會冇得續約架？D實任教師，個個都係明哲保身。個個都唔教書架，留返晒一堆學生等死。知唔知點解咁多學生出去補習？因為好多人，真係自己搞唔掂，學校老師又唔教，之後佢地先出去學之嘛。我地呢D合約教師，教學生抗爭？你即刻唔使返工啦。冇左份工，邊個同你畀家用，邊個同你還學費呀？冇左份工，你咪廢青囉。抗爭？痴線架。

（三）

我都教左十三年書啦，都係年年續約既合約教師。仲未入到編制架。校長？呢個世界D校長，個個都賤格架。點解？佢地夠膽死開文憑教師常額位，畀我地呢D合約教師，當果D學位教師常額位呢就係升職用既。校長，睇住D老PAT PAT個個唔做野，D野又要人做，咪捽我地D新人做囉。你以為呢個世界真係有教育理想？個個都係想放工，平平安安逗份人工，安安樂樂等退休之嘛。爭取公義？唔好玩啦。老師都係人，都係想放工架咋。有D良心既老師，都好辛苦架。好似D校長咁，開會果陣，就要求話要我地班，英文科合格率要100個percent啵。喂，大佬，你都要諗下你放入黎畀我果D係咩料先得架？你果Ｄ中一至中三果D英文老師，冇一個教書既。個細路入黎，基本句子結構又唔識，一句入面唔可以有兩個動詞又唔曉。點教jel？仲有呀，D數學老師仲賤到成日同D男仔講，話男仔做數叻就得。中英文就唔使太叻。喂，為左自己果科個成績，你都留返D生路畀我地丫。我教書既，點會想自己D學生唔合格丫。但係，大佬呀，考果個唔係我丫嘛。佢地唔肯努力，study leave果陣剩係掛住操數，又唔睇返自己D文，又唔做返D grammar，我可以點？到我條數唔好囉，咪升左個數學老師做常額，唔升我囉。D細路個個畢業點解中英文唔好？唔好問我啦，問下Ｄ校長，係點管間學校架囉。

（四）

唉。有時睇住D細路，個個天真無邪，但就只係讀唔到書。咁你都明白，呢個世界，真係唔係人人都讀到書架。有時見到D女仔，生得正正常常，我都知佢地會考果陣去考，一定會死架。我都偶爾會同佢地講，叫佢地點都做好D Listening ，寫字要寫快D。咁樣，去做個診所助護，都叫做舒舒服服有冷氣嘆，第時如果識著個醫生，都叫做有條出路丫？D男仔呢？大大隻隻既，我都會叫佢去試下考D ABC牌。裝修果D呢，電工牌呢。咁，就算唔係做「水電工阿賢」果種水電工呀，都叫做可以叫做有門手藝，唔使做倉務呀，搬貨呀咁。但係，你教佢地呢D野，畀你D上司知道，佢地就會話你：做咩唔叫佢地好好讀書？萬一你果班個合格率跌左，你咪冇得續約囉。你話啦？真係為學生好？唔好玩啦。個個老師，其實都係度跑數架咋。

這些故事，給我什麼教訓？很簡單，真的為學生著想的老師，只會心痛。因為，在制度下，老師都要學生考好試。雖然，我明知道他們不是讀書的料子，我亦知道他們可以有別的出路。但我叫他們找別的出路，我的合格率就會低一格，我就不會被續約。這就是現在合約教師地獄的生態。而我肯肯定，現在在編制內的老師，就算知道，都只會對合約教師們，說聲加油而已。