零真實性既真人騷（毛言地）

四個小生去旅行未開播先出位，全賴謝賢打人事件。有人話，咁無非係想炒熱個勢，等開播果陣多啲人睇，但如果衝突係真的話，咁就代表預告果陣既溫馨場面都係扮出黎，好似拍戲咁。當然，仲有可能就係，曾江病同謝賢嬲都係假的。真人騷本來係應該拍攝出當事人最真既一面。而電視台為左收視肯定會係節目要求拍攝者加鹽加醋。藝人虛偽人所共知，因此大家應該要清楚所謂既真人騷只係另類既劇集。

ＲＵＮＮＩＮＧ　ＭＡＮ係好多人都鍾意睇既節目。大家鍾意佢夠搞笑，睇住主持同嘉賓為左贏而搞盡腦汁同經常出現蝦碌鏡頭，娛樂性滿分。幾年前，佢地黎過香港既朗豪酒店拍攝，個遊戲係類似係幾百個著住同一件衫既人當中要搵到指定既物件。筆者就係果幾百位老臨既其中一個。你可能會覺得有機會近距離接近明星好正，但其實佢地都只係會經過你，因為佢地一早就知你唔係目標。除左一大班收幾百蚊既路人甲乙丙之外，準備果陣其實仲有幾個ＴＶＢ認得出個樣但講唔出乜名既女藝人坐係我地後面，而遊戲當中要搵既野，都好自然係佢地身上。

遊戲開始之後，當然會見到嘉賓搵左幾個錯既目標，你呃我我呃你最後有人終於搵到要既物品，但其實搵既過程只不過係扮出黎，因為佢地都知道佢地要搵既目標係咩位置。成個節目流程，都只係跟劇本去加強比觀眾既刺激感。而且，一個鏡頭背後其實有幾十部攝影機對住同一班人，到底有咩人可以係咁多鏡頭面前仲可以展現自己最真既一面？

四個小生去旅行反而冇咁複雜，起碼成個行程都淨係圍繞四個主持。但係，如果成個節目只係四個人四圍觀光、影下相、食靚野，咁就變左同一個旅遊節目無異。所以，不時有啲衝突，發火互插幾句、但最後又你攬我我攬你咁「真情流露」，先啱大家口味。

點解通常依類節目都會齊哂依幾類元素？

點解幾廿歲既曾江突然病到，要坐輪椅工作人員都唔暫停拍攝，比佢休息先，反而仲會搵四哥推住佢周圍玩？

老人家有病痛一向可大可小，到底係ＴＶＢ真係咁冇人性定係照劇本做，我比較相信係後者。

早前係無線播既十二道峰味我睇過一集，其中一ＰＡＲＴ內容大約係深夜謝霆峰一個人係廚房整佢既招牌菜然後比一個女嘉賓無意中見到仲要謝霆峰教佢煮。個故事編排唔錯，但點解依個咁無意既過程會有攝影機拍到好似電影咁？其實大家都明白的。

我相信唔少人都知道其實好多所謂真人騷都係假的，但咁唔代表電視台隨隨便便咁搵四個人去旅行照劇本咁玩就可以叫真人騷。我唔否認依類節目有佢好睇既地方，用黎消磨時間都算一流，但就算全部野都係假既，起碼唔好連個節目性質都想呃觀眾。

作者：毛言地（本文章由聚言時報授權提供）