中共對各地方言恨之入骨,推普滅粵亦謀算已久。九九年實施《國家通用語言文字法》後,不過十年,廣東話新一代早已用語全非。而主權移交唔耐嘅香港,亦急不及待,要由校園開始,廢除粵語。零一年,時任語文教育及研究常務委員會(語常會)主席田北辰就提出,「中一起應全面用英語及普通話為教學語言」,全港嘩然。硬攻不成,喺零八年開始用利誘政策:「語常會普通話教授中文科(普教中)試驗計劃」。撥款每間學校一百萬,聘請大陸教員來港「指導」。

撥款計劃毒延至今,據港語學統計,約七成二小學已有「普教中」計劃。學童嘅語言用字逐漸扭曲,切斷港語傳承。一四年九月十四日,《蘋果日報》報導,有學童連「水皮」一詞都唔識點解。樂善堂梁黃蕙芳紀念學校校長伍家珍就坦言,見過唔少因普教中而引起的語言混亂,有小學生只識「橡皮」而唔識「擦紙膠」,只識「圓珠筆」而唔識「原子筆」。「普教中」不知不覺亂港語已久,誠為「碎粵神偷」。然而,要強行推銷廢粵政策,蒙騙家長、學校眼睛,就出咗唔少「掩耳盜鈴」之舉,不妨細看。

一、「教好中文」為名,取締粵語為實 教育局提出「普通話教中文」嘅理據在於普通話更加貼近書面語,可以令作文去除「方言俚語」,更為通暢。其實粵語詞匯古雅,「明月幾時有」、「莫使金空對月」等,節奏鏗鏘,亦都承載古雅文化,唔係教育局所唱衰咁粗鄙。課堂禁粵,更成為師生溝通嘅一大障礙。

《用普通話教中文的問與答》,頁廿四就有個研究:「根據培道小學的學生考試成績,上學期完結時……中文科成績則差了1.49分。下學期考試成績的比較進一步說明此現象……中文科則低了2.36分。培道小學不按學生成績分班,這些比較也具一定的參考價值。」鮮魚行梁紀昌校長回覆港語學「普教中學校調查」寫道:「目前我們不是普教中,幾年前我們曾試驗普教中,但經兩年實驗後發覺不理想,故暫停了。」仲有好多實證,篇幅所限,未能盡錄,都證明「普教中」百害而無一利。

圖片來源:作者提供

圖片來源:作者提供

拋棄高薪厚職創立「陳校長免費補習天地」嘅陳葒校長,則早於O八年撰文《普通話教中文的迷思》,直斥其非:「一位據說有幾十年相關經驗的資深教育界人士斷言在香港以普通話教中文是『絕對百利而無一害』,其他不怎麼資深的教育界人士也紛紛表示歡迎,認為有助學生『我手寫我口』,可以提高中文水平。但是,實際情況又如何呢?」

「實際情況是這世界除了上帝之外,不可能有『絕對百利而無一害』的東西或事物……普通話教中文是為了普通話還是為了中文?如果是為了前者,則普通話教學不應限於中文課堂(如英語教學也不限於英文課堂),歷史地理科學數學體育美術都應該用普通話教。如果是為了後者,則以學生更熟悉的廣東話來教會更有效。所謂的『我手寫我口』,其實只是一個醜陋的誤會而已。」陳校長如是說。

連教育局喺佢網頁<普通話(中學)—問與答)都承認:「仍未有確實證據,證明以普通話學習中國語文的學生的一般中文能力會有所改善。其中兩項研究發現,以普通話學習的學生的中文能力,與以廣東話學習的學生並無分別,甚或表現更差。」教育局明知「普教中」有害,都大加推廣,其政治意圖,昭然若揭。

二、「家長歡迎」為名,迎合雙非為實 一五年四月十三號,教育事務委員會會議,李慧琼喺立法會聲稱:「民建聯係支持普教中(普通話教中文)呢個方向嘅,亦都認為呢個係大勢所趨,家長歡迎,學生又有需要……理論上母語係教授……欸……科目讓學生最容易吸收嘅一個工具嚟家嘛。所以啫係選擇用咩語言教學呢,除咗係學好中文之外呢,仲有其他考慮嘅。」民建聯真係「順應民意」,先至支持取締粵語教學?

根據 now 電視新聞台互動民調結果,原來市民根本唔係咁諗囉。 75% 家庭觀眾反對「普教中」,支持者只得 8% 。「大勢所趨,家長歡迎」係假嘅;「學好中文外,仲有其他考慮」呢?就真係「仲有其他考慮」嘅。鬼拍後尾枕!

上面提到嘅伍校長,亦都回答過呢個問題:「近年多了普教中,乃雙非童來港,令普通話語境增強的時勢造成。」只怕民建聯所迎合嘅,並非香港本地人,而係雙非家長。當普通話變成香港主流語言之時,對本地學童同雙非,孰利孰害,係清楚不過嘅事。

圖片來源:作者提供

圖片來源:作者提供

第三、「推廣普通話」為名,洗腦滅粵為實 我哋搵到教育電視零四年嘅短片<驚心動魄>,名為「粵普比較」影片,用一隻黑衣白臉嘅魔鬼代表粵語,其反覆用普通話強調要用粵語一統天下。運用卡通片元素向小朋友洗腦,極其可恥。

圖片來源:作者提供

圖片來源:作者提供

中文教材嘅普通話版,因為取材大陸教材,亦都染上洗腦元素。《快樂學語文》普通話教中文版書就有童詩《我們的國旗》。稱「每一個人都露出神聖的目光。目光好像會說話,國旗,是傾聽的對象」。

「普教中」同國民教育更加係互為表裡。《香港學校用普通話教中文建議書》喺08年明文指出,「學好普通話是國民教育工作的重要一環,也是提高國民意識的不可或缺的舉措。」官校英皇就早已失守。中文科教學報告明言,其普教中計劃「把國民教育的元素湯透到中文課程的教學中……形成民族自豪感和責任感。」

普通話教中文既然係掩耳盜鈴,作為家長,更加唔好開門揖盜,選擇「普教中學校」,並且要喺校內為仔女母語學習嘅權益發聲。我哋亦都需要更多人搜集資料,好似陳校長咁,直斥普通話教中文政策之惡,令到市民廣知其害。教育局既然知道「普教中」禍害,仍然自欺欺人,我哋亦都唔會等佢悔改。從今以後,不以教育局為對手,當對辦學團體、家長曉以大義,亦於立法會喚醒議員良心,要求召開聽證會,將「普教中」流弊公諸於世;責問教育局,為何死抱「普教中」貽害子孫。

正如港語學與各大教師、學生、大專團體喺四月十三號,立法會「辦學憑良心,粵語教中文」集會共同聲明所言:「各大辦學團體,亦宜自省、自謀、自重;『普教中』既然係『校本自決』政策,根治『普教中』遺害之良方、補救同學中文之義務,爾等責無旁貸。誤入『普教中』歧途之學校,務請改弦易轍,切勿抱殘守缺。每家每校之家長、教師、學生在上,爾等一舉一動,何止十目所視、十手所指?苟能撥亂反正,知錯能改,善莫大焉,不辱辦學使命,對得住天地良心。至於教育局,吾等已不作任何期望,予欲無言。」

圖片來源:作者提供

圖片來源:作者提供

作者:陳爍(本文章由聚言時報授權提供)


 「碎粵神偷」之掩耳盜鈴(陳爍)

 https://www.facebook.com/GaldenPolymer/timeline