團結不是圍爐取暖，各投所好不是分化（陳假）

我覺得有唔同組織出現係社運係一件好事，不論左右翼都係好事，咁並唔係分化。

不同組織出現可以提供選擇畀參與者去搵一個比較適合佢嘅地方，相信有啲參與者會覺得依家參加緊個組織唔太啱佢口味，不過又無啱嘅選擇，依個其實係資源錯配。

而且有唔同組織出現可以鞭策組織進步，做得唔好嘅組織就會受到支持者流失嘅徵罰，因為佢地會過檔，其實依個就係類近我地熟悉嘅自由市場機制。

不過依個鞭策機制嘅前題係參與者要有獨立思考，唔係盲撐組織，要個組織進步唔係盲從大圍意見就可以，組織出現問題係要提醒佢，離開組織可以話係最後選擇（不過搵到更適合地方係另一回事），因為要建立一個組織真係唔易，但係唔好死忠。對於保持獨立思考，我建議大家可以去睇唔同方面資訊，例如唔好只係睇一份報紙或者網媒。

好多人叫團結、唔好分化，不過就係想個個都用同一套野，甚至要聽命同一組織，咁咪會變咗好似大家得返 CCTVB 一個台咁囉，一個無競爭嘅台最後只會變膠台。當然我唔反對組織之間保持友好，甚至可以係有共識之下聯合行動，不過就切忌變成朋黨間圍爐取煖。

咁我係咪即係唔贊成團結呢？當然唔會。不過我對團結嘅理解並唔係要強迫聽命於一個組織甚至合體做一個組織，老套啲講句，君子和而不同，各有各做。對於見到對方立場唔同就攻擊對方嘅行為我好唔贊同，不過要補充一點，如果受到攻擊，保護自己係必需。

（頭盔：以上社運人士並不保括篤灰者賣港泛民等人）