個個都想做阿里巴巴、長和、Facebook和Apple，咁邊個做三文治、賣生果、賣報紙和種菜呀？
現今社會，追求高增值、高回報、快速成長，連廣東省都要趕絕低端低技術工廠的時候，做代工無運行；所以，入股快速成長公司、幫它提升價值、然後上市EXIT，便成為現在流行的投資和賺錢必殺技。再然後，理所當然地玩財技、搞上市、再分拆、供股批股、買殼賣殼、私有化再重組、用上市公司錢交租比大股東、派重手股息、左手賣右手接，之後重新來過，釋放價值，然後，又……嘩，咩咁似食神裡面史提芬周講過的對白呀？無錯！
大概二、三十年以前，經營一盤生意，例如做簡單的一買一賣、B2B的批發貿易生意、甚或做廠等等，都比較簡單直接，只要專注自己所長，努力找客，用質素和信譽打動客戶，用心經營，慢慢由做到、做好、做實、做大、到做強，總會有所成就。
現在，講快速談效率，兩季內未達效果，project即斬。網上一個月的search無反應，即轉keyword。一年業績無起色，CEO都要請走。加盟店無生意，即使只開了三、四個月都照執唔願守。以前，由「做到」至「做強」，可能需要好幾年至十數年時間，現在，卻只有幾個月甚至一季內的時間。所以，連街邊檔如台灣飲品、豆花妹撈米線，都在不斷franchise，務必用最少時間攻佔最多地方最大market share最大品牌效果！但中間的「做好」、「做實」、「做大」，就好似跳步咁一早就忘記了。
不過，最終都是結果、成敗論英雄，莫耶斯離開曼聯之後也過得不錯呢，若果真是做唔住、唔啱做的話，就不要勉強了，快點放手離場，再來過吧！因為，速度的重要程度不比涵養和質素低呢！
作者：Ivan Leung
圖片來源：蘋果日報
