牛油蒜蓉煎帶子

早前去工展會時食過$10一隻嘅牛油蒜蓉煎帶子， 雖然都真係幾好食， 不過都覺得貴貴地嘛！ 

今日行過759見有帶子特價， 所以就買左包又嚟試下啦~

其實我當日都係個食店企左一陣， 睇住啲姐姐煎啲帶子， 睇佢地煮都有八九成明白， 不過落手煮都唔知成唔成功， 買齊材料試下啦~

帶子係煮之前需要由拎出嚟解凍， 我都用左大約一小時先可以溶解晒呀~

759啲帶子都算大粒， 不過我就覺得啲膏就唔多肥美， 都只你有三粒係紅卜卜呀~

首先將一粒蒜頭剁成蒜蓉， 其實蒜蓉多少可以因應個人口味加減呀！

帶子用廚房用嘅吸紙印乾水份~

用大約兩湯匙嘅牛油起鑊~

待牛油溶晒之後， 就可以放入帶子煎~

當煎至金黃色後(約一分鐘)， 就可以加入一半的蒜蓉~

之後就反轉煎另一面， 同時加入餘下嘅蒜蓉， 同樣煎至金黃色(若發現牛油汁煎得變乾， 可再加入多一點牛油)~

最後當兩面都煎到金黃色時， 又聞到好香嘅蒜蓉味， 咁就成功， 可以食得啦~

哈哈哈...味道都算唔錯， 帶子配埋啲蒜蓉又真係幾夾， 加上啲帶子又唔韌口， 都算幾鮮甜， 所以各位家庭成員都話好食呀！

唯一就係細佬兩公婆都話蒜蓉味重左啲啲， 但小豬爸又話蒜蓉味好香， 所以話呢....個人口味都真係幾緊要呀！

MY FACEBOOK~

Kathy Wong@myblogs.asia