感覺平和 : 人人和平小飯店

今日係一班麻甩飯聚，小第遲左到所以一坐低已經要開turbo食野。

呢度環境簡單乾淨，牆上面有手寫推介菜式。

有野上檯成班麻甩仔當然唔會等我，所以相中隻新會古井荔枝柴燒鵝鵝已經食左幾件。

鵝肉幾嫩唔錯，鵝皮幾薄又有點柴香。

食燒鵝之前個碗已經有舊叉燒，冇錯呢舊就係加拿大白豚梅頭叉燒，食落入口係幾鬆化既，不過見唔到成舊叉燒上檯個樣，令人若有所失咁囉。

大暑就到整個八寶海皇冬瓜盅岩曬，冬瓜肉唔少而湯汁唔算多但非常清甜，一個冬瓜盅咁多人分有點唔夠喉。

菠蘿船咕嚕肉都可以，咕嚕肉味道酸甜度適中，最surprise用左新鮮菠蘿，令人連菠蘿都食唔停。

叫左咁多重口味野，點都要叫有菜食既海鮮雜菜煲，減低一下油膩感都要啦。

好順得你既順德煎蠔餅都係香口野，口感實在帶蠔肉鮮味。

順德煎釀鯪魚做得好好，夾起發現魚肉同魚皮完全唔會鬆散，食落煎得乾身又有不錯魚鮮，真心覺得叫多一條都唔過份。

砂窩鵝汁炒飯用左砂窩炒上已經係香口保證，飯粒入口香脆加埋鵝汁既香味，自己忍唔住食左兩碗。

荷蘭肥的燒腩肉既肉同脂肪層層分明，咬落豬皮唔算好脆但肉香十足。

呢餐飯大家一路食都冇太多說話，出品好令人

專心食野唔出奇，冇咩野講但氣氛沒有突兀卻感覺平和，同呢度既店名不謀而合。

 人人和平小飯店

地址：北角堡壘街6-8號A地舖

Tel : 2570 8616