喜萬年係細細個就聽過既一間酒樓,到大個自己出街玩,住係港島既人坐車經過灣仔,都應該對佢舊舖個大招牌有印象。

時移世易香港酒樓式微,而家搬細左都重叫做可以做落去,就係一個打牌既日子約埋戰友飲完茶先開戰。

點心叫左正路既蝦餃、燒賣、山竹牛肉球同春風得意腸等,大家都覺得唔好叫咁多先因為訂左半隻乳豬。

蝦餃個樣同出面既有d分別,外皮超薄完全睇到入面飽滿既蝦肉,食落夠熱蝦肉口感幾爽唔錯唔錯。

燒賣都係睇落飽滿,食落肉感十足既出品。

山竹牛肉球做得都好,冇咩鬆肉粉同用足牛肉做餡料。

炸兩都及格,油炸鬼咬落重係脆既,腸粉個粉槳食落都幾滑而腸粉又唔算太厚。

掃完點心到半隻乳豬跟碟麵包皮上場,雖然得半隻但份量都唔少,估唔到中午食乳豬都有盞紅燈跟埋上檯。

豬乳件食落有溫度應該燒好唔係好耐,豬皮入口薄脆油香又濃已經合格有找,加埋豬皮下既軟嫩豬肉,難怪店家既乳豬咁多年都係名物。

呢度既乳豬做得好唔意外,反而點心都有水準就估唔到,下次唔食乳豬齋食點心都有得諗。


喜萬年酒樓 Asiania Restaurant

地址:灣仔軒尼詩道288號英皇集團中心地庫

Tel : 2528 2121


 乳豬以外 : 喜萬年酒樓 Asiania Restaurant

 https://www.facebook.com/blackholemini