即食麵，可以話係懶人醫肚、無飯夫妻，飽肚佳品。不過就算幾多種味俾你揀，食得多都會厭。不過原來加小小心思，改下煮法，就算咩麵都可以變成上菜上位！今日筆者就介紹幾個新煮法畀大家試下，將個麵變成街邊食一樣咁正！


1.辣麵加菜 溝淡湯底又加餸

不論辛辣麵，定係泰式冬陰功湯麵，其實都仲有好多人頂唔順個辣味。當然有人就會選擇落多少少水、或者落少啲湯粉減辣。但其實只要有棵白菜仔或芽菜，可以試下煮個陣連埋湯粉一齊煮麵。

因為菜本身有水份係入面，煮個陣佢自身水份會出黎、但又會同時吸收到辣湯汁。所以湯汁本身就會被溝淡，而同時你又會有味菜做配料，食落無咁辣又無咁寡。

2.煮麵唔使煮足三分鐘 出來口感更彈牙

其實好多人煮麵時，都會跟足說明煮足三分鐘（或包裝上指示）。不過食得耐小小，個麵就會淋到食唔落。但唔想咁樣？其實煮個陣，你預早小小熄火就得。因為你煮足三分鐘佢的鐘係全熟，但你熄火後個一分鐘內，個湯溫度都係煮緊嘅狀態。所以你預早半分鐘熄火，剩低時間由佢自己煮就差唔多，煮出黎自然爽口又彈牙。

3.濃湯麵無肉食？ 加豆卜重好食！

話說即食麵除咗某幾隻款外，都好少真係會有肉你食。但係其實用豆卜都可以做到同樣口感：一樣有咬頭之外，重可以索到好多湯汁係入面，食落自然更加惹味。而且佢地保質期比肉更長、解凍更方便，所以買定一包放係雪櫃，就唔怕消夜想食麵無野加料。


4.加蛋落麵變化多

阿媽教落，煮麵加隻蛋，食麵都覺飽。你鍾意嘅，成隻煮到熟晒都得，識得煮重可以煮成溏心蛋又得。甚至就咁打個蛋花落去都無問題。你想點加餸就隨你喜歡，不過煎蛋嗎…就有違筆者「懶就是簡單」煮食原則，所以唔計落去…（我女朋友煮的話就唔同講法，因為唔駛我煮）

5.湯底唔夠味 加咸係大忌 辣味更惹味

當好多人食麵覺得唔夠味個陣，第一個反應都係去搵鹽搵豉油去加味，但其實咁樣只會單純得個咸味，而且落太多仲會變味。但其實加小小胡椒粉（白或黑都得），就可以幫你個湯底加返小小辣味，唔夠的話仲可以出動辣椒醬，保證夠晒刺激！而且對著有腥味嘅湯底，重可以用佢地去辟味。（好多賣魚湯嘅餐館，都會見到有白胡椒粉供應就係咁解）