【真心推】韓國 VT Super Hyalon 超級玻尿酸系列

美容

2020-12-19 |

2052

講真，中女到末期，對呢啲韓國妹妹仔（女團CLC）代言嘅產品，心中都不禁疑慮自己係咪真係啱用。我今次要介紹嘅係韓國品牌（&韓國製造）VT Super Hyalon 超級玻尿酸系列，一包入面每樣都有啲，如果去旅行或者staycation呢啲都幾方便，又或者可以入手嚟試下先，啱用先買貨size又得。嗱，我就真係好比心機每樣都試曬，而家分享下心得先！

首先呢一包「福袋」入面有：
補水面膜 x1
小布丁清潔冰膜 x1
眼膜 x1
睡眠面膜 x2
精華 x1
爽膚水 x3
乳液 x3
面霜 x3

包裝清一色白X藍，英文字細細隻咁，我又唔識韓文，講真係有少少confuse唔知點樣用，咩次序用先啱（汗）不過都唔算好難估嘅。而呢個VT Super Hyalon 超級玻尿酸系列特別之處，就係加入咗保濕明星專利成分【G:H8™】，咩黎？你可以叫佢做超級保濕鎖水成分聚谷氨酸，佢可以瞬間喺皮膚表層形成水網膜，深入肌底即時鎖水。結合8種玻尿酸複合物，比起好多單一層玻尿酸，G:H8™嘅好處係一take過疏通、滲透、補水、鎖水，無敵全方位補濕。

正常routine嚟講，就爽膚水 > 精華 > 乳液 > 面霜就夠。其他嘅就特殊保養，一星期一兩次～試晒咁多款產品，我款款都幾鍾意，首先，雖然佢搵啲妹妹仔宣傳，但實際上老少婦如我，覺得都夠潤！質地算係清爽得來帶啲潤，唔係一味笠，亦都唔係搽完等於冇搽個隻爽，所以我真係幾鍾意。如果你係要「仿如無物」嗰隻清爽度，咁Super Hyalon系列未必係你杯茶。真心我覺得款款都幾好用，但如果隻隻都叫你買又未免太過膳稿（笑）所以我揀3隻我覺得值得入手嘅介紹吓先。

第一位：超級玻尿酸補水面膜 VT Super Hyalon Mask （HK$88/6pcs）
一片面膜有28g精華，講緊半支精華液多啲嘅份量喎，仲唔抵入手？當然啦，面膜入面嘅精華係冇Ampoule咁concentrate，正正因為咁，面膜嘅精華就顯得更加清爽喇。面膜嘅紙質係我試過嘅面膜之中最薄嘅，新聞稿叫呢隻做「環保天絲空氣面膜紙」（唔知實質其實係乜材質），佢hold得非常之咁多精華，好勁！面膜剪裁我覺得ok，薄到咁相信都冇人會話佢唔貼面。我見佢咁多精華，仲諗緊敷20分鐘係咪真係吸得哂，點知，真係比我吸乾晒...尤其是額頭位，唔知係咪我乾得太緊要呢？敷完皮膚真係「立立令」，回復20幾歲咁嘅皮膚狀態！！真心正！！

第二位：超級玻尿酸睡眠面膜 VT Super Hyalon Sleeping Mask （HK$128/20 pcs）
好得意噃呢隻睡眠面膜好似一包包collagen supplement啫喱條咁（但千祈唔好內服呀...搽㗎...）即使買貨size都係咁樣獨立包裝，唔好聽就真係唔環保，但的而且確咁樣係衛生好多嘅。微微粉藍色，啫喱狀，同韓國某出名sleeping mask品牌望落差唔多，但我個人覺得VT透薄啲，冇咁笠黐黐，少啲假香精味。Sleeping mask係咪一定sleep先用呢？我想話唔係嘅，薄薄地一層，按摩面部，吸收之後皮膚會變得好滑好細緻，係妝前打底必備好物！所以佢獨立包裝咁樣我覺得非常之方便帶出街用（雖然個疫情令到我已經冇化妝好耐）一包sleeping mask有4ml，夠晒用㗎喇！

第三位：超級玻尿酸精華 VT Super Hyalon Ampoule （HK$138/50ml）
諗咗一陣究竟簡精華後定爽膚水好，兩隻我都好鍾意，但我又唔想打和啦super咁樣樣，最後都係揀咗精華。點解佢稍勝爽膚水個馬鼻？因為我皮膚真係有啲乾，而呢隻精華好夠潤，真係可以做到即時補濕同埋深層補水。皮膚啲乾紋同毛孔用咗佢真係消失咗，配合我嘅至愛導入機，好正，有出去做treatment嘅效果！