小小豬學琴記

小小豬古古怪怪係度做乜? 知唔係因為好心急好想快啲入去學彈琴囉~

係呀...小小豬又去學課外活動， 就係鋼琴啦！ 不過其實小小豬都唔係學好多活動， 都係踢足球同彈鋼琴兩樣， 一文一靜都唔算多啦！

我地點解俾小小豬去學彈鋼琴， 其實都係同小小豬嘅專注力比較弱有關. 事緣係暑期班時同社區中心嘅姑娘傾開計， 問有學啲咩活動對訓練專注力有幫助， 姑娘就即刻話去學彈鋼琴啦， 因為彈琴時係需要手、眼、腳嘅協調， 同時亦需要好專心去睇住琴譜去按琴鍵， 加上又要坐定定去彈， 所以對整體嘅專注力好有幫助.

既然姑娘建議， 加上小小豬一向都比較鐘意音樂， 係屋企都有玩開電子琴， 所以就決定俾佢試下啦！

我地都係決定俾小小豬係返開暑期班嘅社區中心學， 嚟近屋企方便啲， 另一個原因就係依度學比較抵， 初班堂都係$90. 初初學唔知小小豬係唔係真係鐘意同有冇恆心， 所以平平地試下先都不先啦！

不過亦都係因為幾抵關係， 我地由八月開始登記排隊， 終於等左差唔多半年， 可以今個月開始啦~

小小豬一聽到話可以去學彈鋼琴， 佢地不知幾開心， 仲超心急添~

哈哈哈...等到夠鐘， MISS就帶左小小豬入琴室上堂~

由於家長唔入得去， 所以我都心思思咁諗下小小豬上堂會點呢? 佢會唔會識彈呢? 滿腦子都係問題， 正一問題媽媽呀！

不過隨著上完堂， 我嘅問題都解決晒啦！ MISS話小小豬都好乖好留心上堂， 對音樂個敏感度好好， 而且上堂所學到嘅嘢都好快吸收晒， 教嗰幾個音符同手拍擺位佢地掌握得唔錯， 以第一堂學嚟講， 都算唔錯啦！

哈哈哈...聽完MISS咁講我都真係放心晒， 希望小小豬嚟緊可以俾心機， 唔係想佢學識彈到幾叻幾叻， 只想佢可以真心愛上彈琴， 同埋專注力有所進步， 我地就開心啦！