光波芝士焗西蘭花

今日冇意中睇見到有朋友仔整左芝士焗西蘭花， 見個做法都係非常簡單， 加上屋企又有粒西蘭花係度， 所以我又試下整啦~

三樣材料就足夠整依個好味嘅餸：西蘭花1棵、忌廉湯1罐及碎芝士~

將西蘭花切小棵之後用鹽水洗乾淨~

之後灼到半熟撈起瀝乾水~

焗盤內倒入半罐忌廉湯~

再鋪上西蘭花~

再將餘下忌廉湯均衡鋪滿至蓋過面~

最後就係面層加入芝士~

最後放入光波爐， 180度焗20分鐘~

美味嘅餸菜就可以上枱啦~

唔係自己讚自己， 依個餸又真係好好食， 一啖西蘭花夾著芝士同埋個忌廉汁， 真係唔錯呀~

我之前去餐廳都會叫芝士焗西蘭花依個餸， 原來係咁易整， 所以下次想食時就可以自己整， 足料之餘自己整又可以抵食啲嘛！

其實依個都算係懶人煮法， 下次再煮時可以唔用忌廉湯， 自己整個白汁， 仲可以加埋南瓜...菇菇...嘅蔬菜， 應該會仲好味呀！