試食：華園蛋卷

小小豬今次又有口福了， 因為得到華園食品送嚟嘅三盒唔同味道嘅蛋卷， 見到咁多美味嘅食物， 依個為食嘅小小豬又點會唔興奮呀~

不過論最開心嗰個， 一定非大肥豬莫屬， 因為大肥豬係超級鐘意食蛋卷， 最利害嘅一次， 試過有一次係坐定定睇電視咁食左大半罐呀！

三款蛋卷味道分別係：椰汁蛋卷、果仁蛋卷及牛油蛋卷， 三款的包裝都係相同， 我個人都幾鍾意依個包裝設計， 以一個鐡罐設計， 入面有六包獨立包裝， 而且每一小包都附有防潮劑， 咁就可以令啲蛋糕保持脆身~

小小豬見到啲蛋卷已經非常心急， 不停問我影完相未？ 可以食未？ 真係一個不折不扣嘅為食豬呀~

首先就俾佢試食牛油味蛋卷， 一小包內附有三小條蛋卷， 分量不多不少， 剛剛好足夠小小豬個茶點~

我個人覺得牛油味蛋卷個牛油味都幾濃， 而且啲蛋卷入口鬆脆， 一啲都唔會覺得硬繃繃， 所以都唔錯！ 小小豬試完之後就不停讚牛油蛋卷好食添呀！

第二日我就同小小豬試食椰汁蛋卷~

其實口感同牛油蛋卷都係一樣， 不過就多一種椰汁香味， 而椰汁味又唔會蓋過啲蛋味， 所以可以話三款味道中我至愛就係椰汁蛋卷(可能我本身都係非常鐘意食椰汁味食物啦..哈哈哈)！

最後款就係試食果仁蛋卷， 不過因為小小豬唔係得果仁， 所以試食依款嘅重任就主力交俾大肥豬啦~

果仁蛋卷就可以話最啱大肥豬口味， 因為食落會有少少花生同杏仁味， 而且唔會太甜， 個味道都幾特別呀！

哈哈哈....三款蛋卷各有特式， 我地三口子就各鐘意一種味道，咁就一人盒皆大歡喜啦！