【食譜】蠔氣得體賀年菜！薑汁蜜糖煎生蠔

呢兩星期進入忙碌狀態，不停計劃出過年食物食譜。

加上又猶疑比唔比包包返學，同埋好似有好多過年要做嘅事都未做，就係咁就變得好忙，最忙係個腦咁囉。

晌忙做糕之前，先出一個可以做過年招呼江山父老叔伯兄弟姨媽姑姐之菜式。

今次係「薑汁蜜糖煎生蠔」，好明顯佢係用薑汁、蜜糖去煎下生蠔咁啦。

我用廣島蠔去整，整蠔同天氣一樣不似預期，明明買之時都ok大隻，但整完又細好多。

但係個味道同生蠔好夾，所以都好推薦比大家呢～

材料：

生蠔      12隻

薑蓉   1茶匙

蜜糖   2湯匙

生抽   2茶匙

水   2湯匙

生粉   1茶匙

做法：

1. 將薑蓉加生抽、蜜糖、水及生粉撈勻

2. 做成醬汁備用

3. 廣島蠔或其他生蠔用生粉或粟粉輕力摔生蠔再沖洗乾淨

4. 然後完全索乾水，再加生粉撈勻

5. 將已經沾上生粉生蠔煎至金黃色後就盛起備用

6. 用細火將醬汁煮熱後再將生蠔回鑊，快手兜勻及收汁便可以上碟

(唔好用太大火，否則黑過墨汁)