黎瑞恩美國賭場演出反應熱爆 保安唔信小恩子大過21歲

黎瑞恩(小恩子)剛由美國演出回港，此行分別到洛杉機及內華達州的Reno(雷諾)兩站演唱，逗留了十多天。小恩子已有二十多年沒有到美國演出，兩場全爆滿，歌迷反應十分熱情高漲，大家衝破現場保安防線，衝到台前要求同小恩子握手，一向親民隨和的小恩子有求必應，一路唱，一路走到台邊逐一握手，小恩子亦有落台跟觀眾握手，因為大家太熱情，小恩子本來想走到後排觀眾位，但場面太過墟冚，被保安阻止，小恩子希望下次可以同後排觀眾握手啦。

而在最後一場Reno的Peppermill賭場劇院演出後，大會安排在酒店內的酒廊慶功，發生了一件趣事。話說小恩子入場時，被門口保安攔截要求她出示身份證檢查年齡，已為一女一子之母的小恩子畀人以為未夠秤查身份證喎，小恩子興奮得即時飛撲攬著外籍保安，反問對方：「你真係查我身份證？」對方一臉嚴肅回答：「係！唔夠21歲係唔可以入場。」

小恩子便告訴對方：「我已經45歲啦！」保安們即驚訝得雙眼幾乎跌落地表示唔相信，隨即核對小恩子的證件，驚愕說難以置信，大讚小恩子好靚女。小恩子笑到聲：「估唔到廿幾年後仲畀保安查身份證，哈哈！」演出期間，小恩子有三日假期並順道四處遊玩，包括：荷里活大道、環球片場等。