繼續補食譜,話說farewell晚餐其中一道「胡椒焗溫哥華蟹」係突然去做。

買材料時呀姨堅持買溫哥華蟹比我試下,佢又怕我辛苦就話叫表妹放工後用薑蔥炒。

咁阿姨買完蟹後,我都無理過呢兩隻蟹,拼命三娘地去預備我要整嘅其他菜式。

當我預備得七七八八時仲有時間比我休息下、撩下臭包玩。

就係呢個時候我好似不甘寂寞咁手痕想整埋兩隻蟹,為何永遠放不低......

二來我唔想表妹放工仲咁辛苦,反正我其實煮四、五款嘢實在太得閒咁,哈。

三幾下就整到呢個蟹喇!好鍾意呢個做法又香又帶少少辣,不過今次我唔敢落太多黑椒,如果夠狠落多啲仲好味呢!

溫哥華蟹勝在大隻,但味道未算係最鮮甜,但我都好開心乜都試下嘛,多謝阿姨~

 


食譜:

蟹    1隻或兩隻

(如果香港買蟹買肉蟹整呢個最好呢)

黑胡椒   2湯匙

洋蔥   半個

牛油    少許

鹽   半茶匙

生抽   少許

酒   少許

 

做法:

1. 將隻蟹宰割後就撲少許粉去煎一煎佢

(出面街做法會炸,因為炸完蟹肉會實淨d咁炒就好炒啲,但晌屋企唔好浪費油去炸了)

2. 牛油爆香洋蔥、及薑、再加入胡椒炒香兜勻加入蟹

3. 加鹽、少少生抽同酒兜一兜就放入焗盤中

方法一:用蓋上錫紙 用220度焗大約10分鐘

方法二:你可以兜完後蓋上鑊蓋焗煮佢5分鐘

點解無蟹蓋?因為蟹蓋好難炒,我就焗既時候先加番個蟹蓋上去焗

如果你地用第二個方法都可以晌焗煮時先加番蟹蓋


 【食譜】胡椒焗溫哥華蟹

 https://www.facebook.com/taisiu9