【食譜】自家製五香肉丁！丁蛋米

對於罐頭食物，我只愛午餐肉同咸牛肉。

但由於太咸關係，我規定自己要打風先可以開罐頭食。

但凡事都有例外，昨日返教會前我想食早餐，就同去茶餐廳食，無啦啦想食五香肉丁米於是就ordered啦。

點知……我無諗過咁都中伏，你都真係無諗過肉丁米都中伏。

跟住我把幾火同大少爺講：我今晚就自己整五香肉丁！

哼，上網睇幾個食譜後大約知點整，就自己動手做。

又比我做得到又做得好喎！我得戚有道理的，比多個哼你。

自己整一啲都唔難，你先炆好啲肉再炒之嘛。

當然中間都有啲方法令肉質唔會硬但又貼近罐頭味道。

食譜：

豬肉    $35(要買半肥瘦梅頭肉)

醃肉：

生抽   2湯匙

五香粉   2茶匙

糖   2茶匙

酒   2茶匙

薑   2片

蔥  2條

另備冰糖 1小粒

醬汁：

油    2湯匙

鹽   1/4茶匙

糖  1茶匙

五香粉   2茶匙

辣椒粉   3茶匙

做法：

1. 將豬肉切成肉丁，再將所有醃料放入去豬肉中醃30分鐘

2. 薑、蔥入鍋中，再加上豬肉

3. 然後就倒入水蓋過面，再加一粒冰糖(如圖中大小)

4. 大火煮滾再慢炆 1小時，期間將雜質、血「畢」走

5. 1小時後水應該收得77、88，得返小小汁，再將肉丁連汁撈起備用

6. 油加五香粉、辣椒粉、鹽、糖放晒入鑊

7. 將所有調味撈勻，再開火

8. 開火後即時將肉丁連汁倒入，煮煮到滾即熄火便完成

*實有人想問：點解點解唔燒熱晒啲油先放豬肉？

答：你燒熱油先放豬肉等於又將豬肉去爆多次，豬肉會變硬的

（呢個步驟係要令調味料融化再同肉丁合二為一）