黎瑞恩全新歌曲《剩下光年》小恩子憑歌寄意希望大家正能量享受每一天

黎瑞恩（小恩子）繼2016年尾復出推出《VFresh感恩》HiFi專輯，令樂迷大叫驚喜，大獲好評。相隔一年多，小恩子再向樂迷報喜，她的全新歌曲《剩下光年》今天（1月8日）派台，全港電台都有得聽。

小恩子一向講得出，做得到，去年正式全面復出時，答應過她的歌迷再出新歌及舉行個人演唱會，新歌《剩下光年》正是專誠為小恩子今年4月將在紅館舉行的個唱而誕生，更邀請得兩位音樂大師雷頌德與黃偉文為小恩子度身訂造，雷頌德作曲、編曲、監製，黃偉文作詞。

由音樂到歌詞兩位大師都花了不少心思為小恩子度身創作，歌詞寫出了小恩子人生無常，隨遇而安的心聲，

「終點不算遙遠，派對越來越短
任務就完成了，渴望要的，不應再改天
剩下未來還會，有些光年，夠我辦場冒險，辦個盛宴……」

小恩子好多謝雷頌德與黃偉文精心泡製了這首《剩下光年》送給她：「呢首歌係同大家講，剩番唔係好多時間，唔好咁唔開心，希望大家充量正能量享受每一天。」她並謂：「首歌Melody其實好簡單，但原來愈簡單Melody，愈難唱得好。」