【食譜】打風天～啫喱骨

無諗過昨日真係會打風，仲要維持咁耐 。

就算之前一晚我都估最多咪打幾個鐘，以為係...…來又如風、離又如風。

點知今次係...…那次季候風 吹得格外兇。

點知真係會8號風球又打足一日，美好星期日就咁就無了。

我之前兩個星期日病、再早一個星期就忙教會義賣，昨日又無得出街，咁就浪費4個星期日。

好彩係我屋企有包豬軟骨、又有栗子先可以炆個豬軟骨食，就整個味噌栗子炆豬軟骨。

個骨炆到包包都食得到，但我無炆到完全啫喱狀因為啲肉唔想太爛

栗子全家得我一個鍾意，到底係咪女人先會鍾意食栗子？大少爺對栗子無興趣。

個臭包咬一啖就放晌佢老豆隻碗度，哈。

今年打好多次風，我實在唔想再食午餐肉喇喇喇！

食譜：

豬軟骨   1.5磅

紅蘿蔔    1條 (切件)

洋蔥      1個 (切件)

蒜頭      3粒  (拍爛)

栗子      1磅 (唔用栗子可以用薯仔) (去衣)

大蔥      半條 (切件)

調味

味噌     1湯匙

(味噌去日式超市有不同味款式可以因應自己喜好去揀)

醬油或生抽  少許

冰糖       1小粒

清酒       1湯匙

水         蓋過豬軟骨面

做法：

1. 將豬軟骨用薑、蔥、少少酒先出水後備用

2. 爆香洋蔥、紅蘿蔔、蒜頭、大蔥兜勻，然後放入豬軟骨兜勻

3. 加入味噌、醬油、清酒兜勻就加水及冰糖

4. 如果用大粒栗子可以加埋入去開始炆，如果栗子唔大粒就中途先放入去

5. 我用高速煲炆大約30分鐘，但如果明火炆就炆2小時，期間要睇下有無收乾水