高質泰式燒烤新貴"爸B燒"
今日同朋友去左新浦崗，目的就係去試朋友極力推介新開張無耐既泰式燒烤店"爸B燒"!!
我地一行5個人，瘋狂叫左超過20款以上既食物，係香港真係好少見到咁高質素但價錢合理，甚至已經叫做幾抵食既燒烤店，我本身住係元朗已經有一兩間好出名既燒烤店我以為已經叫做幾好食，點知一試爸B燒發覺天外有天，無論食物質素新鮮度甚至款式種類都更好，每一樣食物都睇得出係好俾心機燒，燒得靚之餘還能保持食物既水份，外面香脆入面依然非常Juicy, 而且全部都係燒到熱辣辣再上，好似生蠔咁，d蠔汁仲係滾燙到彈下彈下，但一都唔乾身，龍蝦，聖子，扇貝，鰂魚等食得出係新鮮貨，尤其燒鰂魚係我見過咁多間燒得最靚既，嗰泰汁亦非常好味。
爸B燒仲有一樣同其他燒烤店唔同既係，佢地不會用太多香料蒜蓉等去遮蓋食物既味道，因為食材新鮮而且調味剛剛好，食完唔會點口渴。另外仲有一樣一定要推介的係佢地既原個椰青，清甜到不得了，水份又多，問過老闆先知原來佢地特登去九龍城專賣泰國嘢既地方入貨，所以同一般其他既椰青質素係唔同。
同爸B燒老闆傾開偈先知，原來佢後生仔16歲升到F.4時就已經退學，早早就出黎投身社會工作，所謂"工字不出頭"，學好一門手藝之後達成夢想係佢目標，23歲時做擺街走鬼檔創業起家，雖然好辛苦，但因為食物質素高，對客人親切有感情，加上儲落既客底令佢放膽創業進駐現在既新店，正式打開門做生意，亦多左班新客捧場。
如果真係要我推介必食既選擇，我會推介一定要試龍蝦，聖子，生蠔，扇貝，鰂魚，鹽燒海蝦，厚切牛舌，羊架，燒菠蘿同椰青，真係想依家即刻再返去Encore 多次。
爸B燒
地址: 新蒲崗富源街19號地舖
電話: 35946128
Facebook 專頁：
https://www.facebook.com/BAR.B.Q.barbecue/
