男人嘅平均壽命係79歲，而女人就普遍長命啲，平均可以活到82歲。而之所以女人長命啲，科學家話係因為女性嘅基因排列有兩條X染色體，就算有咩基因突變都仲有一條備用，但男人就只有一條。
但除咗基因條件之外，生活習慣對身體健康同埋壽命都一樣咁大影響。原來男人有齊呢5種生活習慣，就可以長命啲！
1. 多啲望女性胸部
雖然聽落好無厘頭，但原來男人如果望得女性胸部多，係會產生正面嘅情緒㗎，情況同望到可愛嘅小動物一樣。
根據2012年喺《Archives of Internal Medicine》發布嘅研究指，有超過一半有心血管疾病嘅調查對象提高體能活動多達37%，原因就係呢組人被要求每日都紀錄低正面嘅諗法。
2. 性生活頻繁
相信百分之99嘅男人都好歡迎呢個習慣，但除咗滿足慾望之外，原來對身體都好有好處！BMJ 刊載嘅一項研究指，性生活令男性死亡率降低足足50%咁多，而且仲可以減低壓力，令人無咁易有情緒病。性愛仲可以令身體釋出令人感到快樂嘅血清素。
整體嚟講，高潮次數較多嘅男士比起較少嘅平均壽命多3-8年！
3. 有責任心
責任感原來都可以創造奇跡！
《Journal of Personality and Social Psychology》嘅研究發現，老人院中要自己照顧盆栽嘅院友喺交際、警覺性以及身體機能都有改善。相反，只係接收由姑娘照顧嘅盆栽嘅院友，喺研究開始後嘅18個月就已經有一半人過咗身。
而責任心同跟住落嚟要介紹嘅兩點都好有關聯！
4. 結婚
結婚係男人正式做「老襯」嘅時刻？原來做「老襯」可以令你長命啲，但就要睇你幾多歲結婚。美國一個多達127,000名受訪者嘅調查發現，喺25歲結婚比起早婚壽命更長。學者指係因為唔健康嘅男士反而會更早結婚，亦有指咁係同另一個人一齊生活、互相約束對方嘅生活習慣有關。
5. 生仔
《Journal of Epidemiology & Community Health》嘅研究發現，有小朋友嘅父母當到咗60歲，平均壽命比無生小朋友嘅男女分別存在2年同1.5年嘅分別。到咗80歲高齡，有仔女嘅男人就比無嘅預計多活8個月。研究學者就思疑原因可能係無生小朋友嘅人擁有更多唔健康嘅生活習慣。
（圖片來源：tumblr）
