【食譜】健康半素肉！日式豆腐肉餅

過幾日個trip係自己飛，所以要安排好包包既食物，即使我唔晌屋企佢都有媽咪食物。

仲有大少爺，我都會為佢安排妥當，去幾日但就好似要做足十幾日咁。

唔知係心理上覺得自己走去玩過意唔去，呢幾日點累都好努力煮比兩父子食。

尤其我個寶貝包，昨晚就為佢煮咗...…日式豆腐肉餅。

佢太喜歡食肉，所以我用豆腐幫佢溝貨，等佢以為自己食緊肉，但其實有一半係豆腐。

包包大啖啖食，佢一食入口就問：入面咩嚟？

佢一食已經知道唔係咁簡單，好彩佢呀媽從來都唔會輸，自己整定個醬汁有啲味，佢就好肯食呢。

材料：

豬肉   180g

硬豆腐   半件

調味：

生抽   1/2茶匙

糖     1/2茶匙

胡椒粉   少許

生粉    1湯匙

醬汁：

醬油或生抽   1/2湯匙

味醂   1湯匙

糖     1茶匙

水    大半碗

另備生粉水

做法：

1. 硬豆腐用隻碟放上面，然後就加少許重既物件，你可以放幾本書，或者疊幾隻碟，而我就成個細LC煲壓上去，目的將豆腐水份壓出

2. 豬肉放入所有調味料然後撈勻，醃半小時以上

3. 豆腐壓出水後就用廚房紙索乾水，再將豆腐壓碎

4. 豬肉同豆腐混合做成餅型就去煎，煎至成型及金黃色就加醬汁落去，蓋上蓋煮5分鐘

5. 加入生粉水做成獻汁就完成