【湯水】祛濕解毒，治療皮膚痕癢！牛大力土伏苓粉葛豬骨湯

依排天氣都總係帶點點潮濕，依啲天氣又真係好容易令人皮膚搔癢，而且又會成日都好似易倦兼腰痠背痛，所以今日去街市買材料煲時，店主就介紹我煲依個牛大力土伏苓粉葛豬骨湯啦~

其實一聽到個名就好似好複雜，我初頭都有啲抗拒，打算簡單買個紅菜頭嚟煲就算。不過店主又好詳細咁同我介紹，一聽到話可以祛濕解毒，好啱濕疹人仕飲，我已經有一半興趣。再聽埋話佢會幫我切好晒，返屋企只係沖洗一下就煲得，所以就請店主幫我執一份材料試下煲啦！

材料：

牛大力 4兩、土伏苓 4兩、粉葛一件、赤小豆及扁豆約一兩、豬尾骨$50、果皮2片及蜜棗4粒

雖然店主講到好利害，不過第一次煲都要上網睇下啲資料，睇下三樣主角係乜東東嘛！

土茯苓 - 除濕解毒，通利關節，治療皮膚痕癢！

牛大力 - 補虛潤肺，強筋活絡，治療腰肌勞損，風濕關節炎

粉葛 - 解熱退燒，降低血糖，透疹止瀉，治療熬夜頸背筋骨酸痛

做法：

１牛大力、土伏苓及粉葛由於已經切好晒，所以用水沖洗幾次就得(真係好方便哦)；

２蜜棗、赤小豆及扁豆浸洗一陣；果皮浸軟刮囊；豬骨汆水

３煲內加入約4L水，然後加入果皮

４待水滾後加入所有材料

５繼續用大火加蓋煲約30分鐘

６之後轉慢火加蓋煲多2小時

７最後加鹽調味，就飲得啦！

小小豬一見到碗湯佢就有點抗拒，依一點我一早就估到，因為佢一向都唔鐘意飲烏卒卒顏色嘅湯，不過可以祛濕解毒兼對濕疹好，所以小小豬都係半推半就飲左大半碗啦！

其實味道又唔係好差，只係我比較少煲依啲山草藥湯唔多習慣，同埋豆味重左啲啲所以小小豬唔鐘意飲味道，我同老公都覺得唔錯，同埋間中解下身體嘅毒，人都健康啲呀！

溫馨提示：由於個人體質都有所不同，我啱飲時又未必每個人都啱，所以大家記得煲之前了解下自己，或者問下相熟中醫/藥材店職員，呢個湯料啱唔啱自己呀！