【食譜】剩餘蔬菜不浪費！蔬菜薯絲蛋餅

今星期好努力煮飯比包包食，因為之後去一星期旅行佢就要食街外食物。

每次帶佢出遊前前後後我都會煮多啲住家飯比佢。

其實要堅持日日夜夜咁煮唔容易，煮……係幾累既事。

而且我仲要兼顧寫食譜，所以每日都要諗唔同食物但又要適合個仔食既。

今日就整蔬菜薯絲蛋餅集雪櫃之剩餘蔬菜，佢味道幾好，如果可以再煎香啲更好，但比包包食就低調d好～

呢類菜式好難影相，呢幅相無乜層次可言，由飯桌影到露台門，更借用包包玩具檯去影。

佢係咁攪攪震，最後佢望住個薯餅入晒神，我就影到呢張。

食譜：　

薯仔   1個

紅蘿蔔、菜、粟米隨意

(可以自己揀菜蔬，我就用菠菜)

蛋  1隻

麵粉   45g

鹽   1/2茶匙

胡椒   隨意

水 1湯匙

做法：

1. 將薯仔切幼絲，其他菜蔬都切幼絲，薯絲及紅蘿蔔絲要蒸5分鐘

*如果好似我咁用菠菜就先灼一灼，再切碎

2. 麵粉、鹽、胡椒放入盤再加入蛋同水

3. 做成蛋漿

4. 將蛋漿倒入薯絲、及菜蔬中攪勻就可以煎

5. 最好每一份都唔好太多，否則賣相無咁靚