【湯水】神奇止咳！洋蔥蘋果蒜頭水

依排天氣都真係唔知想點，上星期就好似夏天熱熱的，今日又開始翻風，星期六仲話會得十幾度，真係天氣過山車，所以大家都要小心身體，新年將至...千其唔可以病呀！

小小豬依排都有幾聲痰咳聲(我估都係早前為食之過，食左好多雪糕啦！)，有朋友仔知道小小豬咳就俾左一個古方我，話佢個囡囡飲左兩次之後就止晒啲咳，佢叫我試下整俾小小豬飲。

有佢嘅成功經驗，再加上屋企又有齊晒三樣材料，所以就試下依個洋蔥蘋果蒜頭水啦~

其實只係三樣材料就可以止咳，聽落又真係好似好神奇，不過其實洋蔥水之前都有好多朋友介紹過話係好有效，就連嚴浩都有介紹過。今次朋友仔依個古方就加左同樣可以殺菌嘅蒜頭，同埋又有蘋果嘅甜味，咁就即係變左勁易入口嘅甜水啦！

其實之前一直唔試整洋蔥水，不過就好怕個味小小豬唔鐘意，煲左唔飲就即係浪費我啲心機，依家有左蘋果味，小小豬都應該唔抗拒，所以就試下。

材料（一人份量）：

一個洋蔥、一個蘋果同埋三粒小蒜頭

做法：

1. 洋蔥去皮之後切細塊；蒜頭去皮後拍鬆

2. 蘋果去皮切細細塊，平日我都鐘意用埋蘋果皮煲湯，因為蘋果皮都一樣好有益，但今次係需要燉啲蘋果汁出嚟，冇皮係會多啲汁出嚟呀

3. 係燉盅內倒放一個碗，然係將所有材料鋪上去

4. 然後放入電子燉盅內燉45分鐘(如果用明火隔水蒸燉的話30分鐘就可以啦)

5. 時間夠就可以將食材取出

6. 拎走個碗就可以見到製成品洋蔥蘋果蒜頭水，原來燉出嚟都唔係太多，真係滴滴住辛苦呀...…哈哈哈。

係燉嘅過程，其實整個廚房(廳都有啲)都充滿洋蔥味，所以都有丁點擔心唔知係咩味，小小豬唔肯飲。當然我都有試返啖，原來個味道又真係唔差，甜甜地又幾易入口哦，唔怪之得小小豬飲得咁合作啦。

咁止咳方面又點呢？小小豬飲左又真係好似咳少左啲啲，就算咳嘅時候痰聲都少左，我估唔多唔少都同飲左依個洋蔥蘋果蒜頭水有關，等我聽日再燉多一次俾小小豬飲，睇下可唔可以止晒啲咳先。

依個古方對小小豬起到小小效用(小小豬似係寒咳，因為入夜後先會咳)，但亦有可能未必適合所有人，因為咳都有分寒咳同熱咳，雖然洋蔥就係屬較中性，不過大家係試之前都係要了解自己體質先呀！