迪士尼農曆新年有新戲！《魔海奇緣》張繼聰X蘇麗珊首度合作 爆笑聲演

蘇麗珊處女配音 興奮到難以抽離

由《優獸大都會》、《魔雪奇緣》創作班底打造，迪士尼全新動畫《魔海奇緣》將於農曆新年爆笑賀歲！電影講述被海洋選中的海島少女慕安娜(Moana)為了拯救族人，決定打破禁忌獨自出海冒險，其後更遇上半神半人的英雄茂宜，聯手對抗黑暗勢力，展開一場奇幻刺激的海上歷險！《魔海奇緣》由新一代女神蘇麗珊(Cecilia)聲演慕安娜、搞笑高手張繼聰聲演茂宜，兩人首次合作新鮮感十足，誓必為觀眾帶來驚喜！

張繼聰望囡囡似慕安娜：夠純真又勇敢

配音經驗豐富的阿聰，要傳神演繹茂宜當然無難度！不過，他就大爆自己今次演得特別賣力，「當我一諗起囡囡大個之後，都會睇番《魔海奇緣》，自然就演得格外用心同努力，想令她睇得開心！」有囡萬事足的阿聰，更Sweet爆表示：「如果囡囡似慕安娜都幾得意，性格可愛、純真又勇敢！」時時刻刻都諗住囡囡，果然是廿四孝老豆，父愛多到滿瀉！

蘇麗珊處女配音 興奮到難以抽離

Cecilia今次為《魔海奇緣》獻出第一次配音，大呼過癮！「我好鍾意慕安娜這個角色，有少少男仔頭、但又充滿童心，同我某程度都好相似，令我配得特別投入！」Cecilia仲表示自己能夠為《魔海奇緣》配音，是一個好夢幻的經歷！「配緊果兩個星期，我覺得好似進入了動畫世界一樣！整個人都變得好『卡通』，好夢幻！」

兩人首度合作 互笠高帽 阿聰笑指：同Cecilia交手有壓力！

雖然今次是Cecilia首次為動畫配音，但卻令前輩阿聰大感壓力：「慕安娜簡直係為Cecilia度身訂造的角色！無論聲音和神態，Cecilia都似足慕安娜，零遺和感！我聽完之後，都覺得有壓力，即刻打起十二分精神去演！」除此之外，他又大讚Cecilia：「她是近年非常亮眼的女演員，有天份、有活力又夠認真！香港就是需要這種女演員！」Cecilia俾阿聰讚到面都紅哂，但亦不忘讚阿聰：「我一知道是阿聰演茂宜，就覺得好Match！他外表好似好惡，但其實心地善良，又有幽默感，同茂宜一模一樣！」

鬥氣冤家 展開非一般航海歷險

慕安娜同茂宜可算是鬥氣冤家，令海上歷險發生好多趣事！阿聰表示：「茂宜是生活了幾千年的半人半神，但又有一顆凡心，想得到人類崇拜。偏偏凡人少女慕安娜，就完全唔俾面！所以，這兩個人的互動好有火花，好搞笑，保證大家睇得開心愉快！」Cecilia就補充：「電影不但好笑，而且仲好感人！配音時，我都忍不住偷偷地喊！大家一定要睇多幾次！」想知電影有幾正，令人又喊又笑，觀眾就要入戲院支持啦！