【芝士控必食】冬日好友共聚之選！手工薄餅 X 多重配料濃情芝士鍋

早前大仁叔叔問小小豬有冇興趣去食PIZZA？有得去玩小小豬就緊係鐘意，再加上可以同佢最好嘅朋友仔SY哥哥玩，依個小小豬就當然即刻SAY YES，所以就齊齊嚟PIZZA HUT食餐飽啦。

依個心急嘅小小豬一早就嚟到，仲不停問SY哥哥幾時嚟...…仲乜咁遲，但其實只係我地早到左...…哈哈哈～

嚟到就先叫杯飲杯先，老公依杯藍莓青檸賓治絕對係推介之選，甜甜地又帶少少酸酸地，就連高要求嘅老公都讚呀。

我嘅草莓青檸賓治，草莓味好香濃，如果甜度可以輕返少少，咁就100分啦(其實可能只係我唔太好甜)。

小小豬嘅什果賓治(放肆啦……剛剛病好就飲凍嘢，不過難得高興就隨他吧)。

味道係點？睇小小豬飲不停就知啦！

我地嘅晚餐就係由依個「慢烤徳國豬手」開始。

其實之前我都有食個徳國豬手，感覺就幾係脆卜卜又或者硬硬地，食落都有點辛苦。不過依隻就好有驚喜，因為以慢煮超過10個鐘，整隻豬手都已經炆得非常入味，而且又軟腍腍又多汁，真係可以話係入口即溶。我地就慢慢傾，老公就密密食，佢一個人都食左大半隻。不過千其唔好漏左啲薯蓉，因為入口好滑身，整體都好好食！

我自己就覺得唔洗點汁，齋食豬手都已經好夠味，不過重口味嘅老公就鐘意點埋個秘製茴香燒汁，佢話仲更加好食呀！

嚟到我最期待嘅重頭環節，就係「情濃芝心鍋」。我係一個芝士控，一聽到食芝士就真係BLING BLING眼，超級期待呀！

芝心鍋係包法包粒、蝦、肉丸、煙肉腸、露筍、雞粒、薯條及青蘋果，由於我地一行六人齊齊食，所以就加配煙三文魚、加拿大藍青口同埋黑椒牛肋肉，實行開心密密食呀～

由於係以三種唔同芝士所配制，所以芝士味都好香，但入口一啲都唔覺好膩，睇下拉芝就知有幾正...…哈哈哈！

店員姐姐教我地將配料放入芝士鍋，之後轉三個圈就係最好味，因為配料俾重重芝士包圍住，真係好味都唔識形容。

小小豬一聽到就即刻好乖仔咁幫我地整嘢食，仲記住要轉三個圈添。

咁多配料就驚喜就係煙三文魚同青蘋果，所以依兩樣就係最快KO，大家都讚口不絕呀！

嚟得PIZZA HUT又點可以唔食PIZZA，所以我地就叫左原作手藝薄餅，試下咩叫手藝PIZZA。原來手藝PIZZA嘅麵糰每日由店員一早新鮮手製，全以人手搓製，所以可以食到那一份感情，今期推出三款口味就係「三文誘惑」、「巴馬風情」名埋「綠野田園」。

兩位小朋友都不約而同鐘意鐘意依個「三文誘惑」(其實我自己都鐘意...…哈哈哈)，因為味道甜甜地又有我地鐘意食嘅三文魚、香菲達芝士同埋希臘乳酪，所以啱晒小朋友呀！

「巴馬風情」就係小小豬另一至愛，因為將面頭上嘅一片片水牛芝士慢慢食，真係俾佢激死。不過其實巴馬火腿再加埋紫無花果乾，都已經好有風味啦！

「綠野田園」就係大仁強烈推介嘅款式，將秀珍菇加蘆筍同鮮白菌之外，仲加入好多脆口嘅松子果仁同埋杏仁片，整個感覺都好清新呀！

睇下佢地食得幾滋味～

其實個餅底真係好脆身，同傳統食嗰啲真係好唔同，好有驚喜，相信今次之後，下次嚟我都會叫返依個手藝PIZZA(不過...…如果有菠蘿配料就真係VERY VERY GOOD啦)。

我地兩家人邊食邊傾計，兩個小朋友又玩得不知幾開心，所以話呢....今次仲唔係對開心時刻PIZZA HUT！