【湯水】秋冬必飲、滋陰潤肺！鮮百合印度椰子烏雞湯

天氣又開始凍凍地，又係時候要煲個滋潤湯水，既可以補補物之外，飲返碗暖笠笠靚湯時，整個人都舒服啲呀！

上次煲竹絲雞湯小小豬都好鐘意飲，加上係果欄買左幾粒靚靚印度椰子，所以今次就煲返個清熱止咳、滋陰潤肺同埋強壯身體嘅鮮百合印度椰子烏雞湯。

材料：

鮮百合三粒、印度椰子一個、烏雞半隻、瘦肉約$25、果皮一片及蜜棗四粒

做法：

1. 印度椰子洗淨切條；果皮浸軟去囊；蜜棗洗乾淨

2. 烏雞及瘦肉汆水備用

3. 鮮百合洗淨備用

4. 煲內放約3L水，然後加入果皮

5. 待水滾後放入所有材料(鮮百合除外)

6. 待再次滾起時，用大火加蓋煲約30分鐘

7. 再轉慢火加蓋煲1小時

8. 然後將鮮百合放入湯鍋內，再煲多30分鐘。

其實之前我煲鮮百合湯都係會一早加埋入去，但原來依個做法都唔太好，太早加入鮮百合就會煲到溶晒。所以喺最後30分鐘加入，咁就時間剛剛，就可以帶出鮮百合嘅味，整啖湯就更加好飲啦！

最後加少少鹽就飲得啦～

我依個椰子控就當然係鐘意飲印度椰子湯，不過今次試左後下鮮百合，飲得出印度椰子味之餘，又有鮮百合嘅甜味，啖湯又真係甜好多，小小豬都讚YUMMY...YUMMY呀！

溫馨提示：由於材料都涉及藥材成分，所以係好因應個人體質，大家記得煲之前了解下自己，或者問下相熟中醫/藥材店職員，呢個湯料啱唔啱自己呀！