【食譜】XMAS PARTY必備！薑餅人家族～

上文提過……我最唔叻畫圖畫，就係咁我最懶聖誕整餅，但人在江湖又少不了出聖誕餅食譜。

日本回來後病了一星期，即使未好番，呢幾日都密集式去做做。

呢個餅昨晚都做得幾趕下，越急就越亂，成盤餅得呢幾隻叫做見得下人。

大少爺就開心，因為佢好鍾意食呢個，呢個係鬆脆版嘅薑餅人，今次我加多了糖又加多了薑粉。

出來後發覺唔使加糖其實係最剛剛好的，焗嘅時候好香，有種好幸福嘅感覺、幸福嘅香甜味道。

過時過節就係要有甜味，你睇下條裙係有款式架！點解會有個著比堅尼嘅呢？因為呢啲易畫囉。

材料： （15塊）

牛油    100g

黑糖    70g 

（如果用普通糖可以減少許糖，因為黑糖無咁甜先落70g。］）

低筋麵粉   150g

玉桂粉     2茶匙

薑粉  2茶匙（如喜歡可以自己增加）

泡打粉  半茶匙

做法：

1. 將牛油切粒，唔好完全放軟，趁佢少少硬但打得到嘅時候就打

2. 糖同牛油打勻

3. 低筋粉、玉桂粉、薑粉、泡打粉過篩，然後將牛油加入

4. 用手輕輕搓勻佢，當粉與牛油搓勻後就慢慢搓成糰

5. 將糰搓成圓型再碌平，放入冰格雪15分鐘

6. 麵糰略為回溫就印模，預熱焗爐170度焗15分鐘(視乎火力而定)